ތަޖަކިސްތާން ބަލިކޮށް، ރާއްޖެ ފައިނަލަށް

ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އަންހެން ވޮލީ ބޯޅަ ޗެލެންޖު ކަޕްގެ ސެމީ ފައިނަލްގައި ތަޖަކިސްތާން ބަލިކޮށް، ދިވެހި ރާއްޖެ އިން މުބާރާތުގެ ފައިނަލަށް ދަތުރު ކޮށްފި އެވެ.

ޒުވާނުންގެ މަރުކަޒުގެ އެތެރޭ ކޯޓުގައި އަންގާރަ ދުވަހުގެ ރޭ ކުޅުނު މެޗު ރާއްޖެ އިން ކާމިޔާބު ކުރީ ތިން ސެޓު އެއް ސެޓުންނެވެ.

މެޗުގެ ފުރަތަމަ ސެޓު ރާއްޖެ އިން ކާމިޔާބު ކުރީ 25-17 އިންނެވެ. ނަމަވެސް ތަޖަކިސްތާނުން ވަނީ 22-25 އިން ދެ ވަނަ ސެޓު ކާމިޔާބު ކޮށްފަ އެވެ. ޖެހިގެން ކުޅުނު ދެ ސެޓު ވެސް ރާއްޖެ އިން ވަނީ ކާމިޔާބު ކޮށްފަ އެވެ. އެއީ 25-12 އަދި 25-17 އިންނެވެ.

މުބާރާތުގެ ފައިނަލްގައި ބުދަ ދުވަހުގެ ރޭ ރާއްޖެ ނިކުންނާނީ ކިރްގިސްތާނާ ދެކޮޅަށެވެ.