ގެސްޓްހައުސްއަކުން ޒަޚަމްތަކާއެކު ފެނުނު ޒުވާނާގެ ހާލު ދަނީ ރަނގަޅުވަމުން، މިއީ ފޭރުމުގެ މައްސަލައެއް: އާއިލާ

ހެންވޭރު ގެސްޓްހައުސްއެއްގެ ކޮޓަރިއަކުން ޒަޚަމްތަކާއެކު ފެނުނު ޒުވާނާގެ ހާލު ރަނގަޅުވަމުންދާ ކަމަށް އާއިލާއިން ބުނެފިއެވެ.

ޒަހަމްތަކާއެކު ގެސްޓްހައުސް އިން ފެނިފައިވަނީ އއ.ތޮއްޑޫ އުމުރުން 27 އަހަރުގެ ހަސަން މަޒުލާނެވެ.

އާއިލާގެ ފަރާތުން ރާއްޖެއެމްވީއަށް ކިޔާ ދިން ގޮތުގައި މަޒުލާން މަސައްކަތް ކުރަމުންދަނީ ރިސޯޓުގައެވެ. އަދި ޗުއްޓީގައި މިދުވަސްކޮޅު ރަށުގައި ދިރިއުޅެމުންދާ ކަމަށެވެ. މާލެއަށް އައީ ބައެއް ޒަރޫރީ ކަންކަން ކުރުމަށް ކަމަށް ރައްޓެއްސަކާއެކު ކަމަށާއި، ހެންވޭރު ގެސްޓްހައުސް އިން ދެ ރޫމް ވަކިން ނަގައިގެން ތިބި ކަމަށް އާއިލާ އިން ބުނެއެވެ. ނަމަވެސް ރައްޓެހި މީހާއަށް އެއްވެސް ގޮތަކަށް މަޒްލާނަށް ގުޅޭގޮތް ނުވެ، އެކަން އާއިލާއާއި ފުލުހުންނަށް އެންގި ކަމަށެވެ.

އާއިލާއިން ބުނީ މަޒުލާނުގެ މޫނަށް ވަރަށް ބޮޑަށް އަނިޔާވެފައިވާ ކަމަށާއި، ނިއްކުރި ފަޅައިގެން ގޮސްފައިވާ ކަމަށެވެ. އަދި ލޯ ވަރަށް ބޮޑަށް ނޫފާގަނެފައިވާއިރު، ލޮލުގެ އިތުރު ޓެސްޓުތަކެއް ހެދުމުގެ މަސައްކަތް ކުރަމުންދާ ކަމަށް އާއިލާއިން ބުނެއެވެ. ފުރާނައަށް ނުރައްކާވާ ފަދަ އަނިޔާއެއް ނުލިބޭ ކަމަށާއި، މިހާރު ހާލު ރަނގަޅުވަމުން އަންނަ ކަމަށް އާއިލާއިން ބުނެއެވެ.

މަޒުލާނަށް ހަމަލާދީފައިވާއިރު، އޭނާގެ ފޯނާއި، ފައިސާ އަދި، ޓެބް ފޭރިގަނެފައިވާ ކަމަށް އާއިލާއިން ބުނެއެވެ.

އާއިލާއިން ބުނީ މިއީ ފޭރުގެ މައްސަލައެއް ކަމަށާއި، ފުލުހުން ތަހުގީގު ކުރިއަށް ގެންދާ ކަމަށެވެ.

ރާއްޖެއެމްވީއަށް އައިޖީއެމްއެޗްގެ މީޑީއާ އޮފިޝަލް ވިދާޅުވީ ބޮޑެތި ޒަހަމްތަކާއެކު ޒުވާނަކު ހޮސްޕިޓަލަށް ހޯމަ ދުވަހުގެ ހެނދުނު ގެނެސްފައިވާ ކަމަށާއި، އޭނާއަށް އެމަޖެންސީގައި ފަރުވާ ދެމުންދާ ކަމަށެވެ.

މި ހާދިސާ އާއި ގުޅިގެން ހޯމަ ދުވަހުގެ ހެނދުނު ފުލުހުން ހިއްސާކުރި މައުލޫމާތުގައި ބުނެފައިވަނީ، އެ ސަރަހައްދަށް ފުލުހުން ގޮސްފައިވަނީ، ހޯމަ ދުވަހު ހެންވޭރު ގެސްޓުހައުސްގެ ކޮޓަރިއެއްގައި އުޅޭ މީހެއްގެ ޚަބަރެއް ނުވާކަމަަށް ލިބުނު މައުލޫމާތަކާ ގުޅިގެން ކަމަށެވެ. ފުލުހުން އެ ކޮޓަރިއަށް ވަދެ ބެލިއިރު، ޒަޚަމްތަކާއެކު އޮތް މީހަކު ފެނިފައިވާ ކަމަށް އެ ވަގުތު ފުލުހުން ހިއްސާކުރި މައުލޫމާތުގައި ބުނެފައި ވެއެވެ.