ރޮނާލްޑޯގެ ލަނޑާ އެކު، ޕޯޗުގަލް އިން ސްކޮޓްލެންޑު ވެސް ބަލިކޮށްފި

ޔުއެފާ ނޭޝަންސް ލީގު އޭގެ، ގްރޫޕް އެކެއްގައި ސްކޮޓްލެންޑާ ދެކޮޅަށް ކުޅުނު މެޗުން ފަހު ވަގުތު ޕޯޗުގަލް މޮޅުވެއްޖެ އެވެ.

އާދިއްތަ ދުވަހުގެ ރޭ ކުޅުނު މެޗު ޕޯޗުގަލް އިން ކާމިޔާބު ކުރީ 2-1 އިންނެވެ. އެއީ މެޗުގައި ސްކޮޓްލެންޑުން ފުރަތަމަ ލަަނޑު ޖަހައި ލީޑު ނަގާފައި ވަނިކޮށެވެ. މެޗުގައި ޕޯޗުގަލް އިން އެ ޓީމުގެ ދެ ލަނޑު ވެސް ޖެހީ ފަހު ހާފުގަ އެވެ.

މެޗު ފަށައިގެން ހަތް ވަނަ މިނެޓުގައި ސްކޮޓްލެންޑުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ސްކޮޓް މެކްޓޮމިނޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ކެނީ މެކްލީން އެވެ. މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ޕޯޗުގަލް އަށް ނަތީޖާ ހަމަހަމަ ކޮށްދިނީ ބްރޫނޯ ފެނާންޑޭސް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ރަފައެލް ލިއާއޯ އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޕޯޗުގަލް މޮޅުކޮށްދިން ލަނޑު ޖެހީ ކެޕްޓަން ކްރިސްޓިއާނޯ ރޮނާލްޑޯ އެވެ. އެއީ ނޫނޯ މެންޑޭސް ތަނަވަސްކޮށްދިން ފުރުސަތެއްގައި ރޮނާލްޑޯ ޖެހި ލަނޑެކެވެ.

މި ގްރޫޕުގައި މިހާތަނަށް ކުޅެފައިވާ ދެ މެޗުން ވެސް ޕޯޗުގަލް މޮޅުވެފައިވާއިރު، ހަ ޕޮއިންޓާ އެކު އެ ޓީމު އޮތީ އެއް ވަނައިގަ އެވެ. ގްރޫޕުގެ ތިން ވަނަ މެޗުގައި ޕޯޗުގަލް ނިކުންނާނީ ޕޮލެންޑާ ދެކޮޅަށެވެ.