ޖަރުމަނު ޤައުމީ ޓީމަށް ކުޅެމުން އަންނަ ޒުވާން ކުޅުންތެރިޔާ ޖަމާލް މުސިއާލާ އާއި ފްލޯރިއަން ވާޓްޒްގެ ކުޅުމަށް، އެ ޓީމުގެ ކޯޗު ހޫލިއަން ނާގަލްސްމަން ތައުރީފު ކޮށްފި އެވެ.

ނާގަލަސްމަން މިހެން ވާހަކަ ދެއްކީ ޔުއެފާ ނޭޝަންސް ލީގުގެ ޖަރުމަނުން ހަންގޭރީއާ ދެކޮޅަށް ކުޅުނު މެޗަށްފަހު އެވެ. އެ މެޗުގައި މުސިއާލާ އާއި ވާޓްޒް ވަނީ މޮޅު ކުޅުމެއް ދައްކައިފަ އެވެ. މެޗުގައި މުސިއާލާ ވަނީ އެއް ލަނޑު ޖެހުމުގެ އިތުރުން، ދެ ލަނޑު ޖެހުމަށް ފުރުސަތު ތަނަވަސްކޮށްދީފަ އެވެ. ވާޓްޒް ވަނީ އެއް ލަނޑު ޖަހައި، އަނެއް ލަނޑު ޖެހުމަށް ފުރުސަތު ތަނަވަސްކޮށްދީފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ނާގަލްސްމަން ބުނީ، މުސިއާލާ އާއި ވާޓްޒްގެ ފަރާތުން އެ މެޗުގައި ފެނުނީ ވަރަށް ހުނަރުވެރި އަދި މޮޅު ކުޅުމެއް ކަމަށެވެ. މުޅި މެޗުގައި ޖަރުމަނުގެ ކުޅުންތެރިން އެއް ރޫޙެއްގައި، ރަނގަޅު އަމާޒަކަށް ކުޅުނުކަން ފާހަގަކޮށް ނާގަލްސްމަން ބުނީ، މުސިއާލާ އާއި ވާޓްޒް ދައްކައިދިނީ އެހެން ފެންވަރެއް ކަމަށެވެ.

މީގެ އިތުރުން ނާގަލްސްމަން ބުނީ މުސިއާލާ އާއި ވާޓްޒް އަކީ، ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ހޯދޭނެ ދެ ކުޅުންތެރިން ކަމަށެވެ. އަދި އެ ދެ ކުޅުންތެރިންނަކީ އެކަމުގެ ފެންވަރާއި، ހުނަރު ހުރި ދެ ކުޅުންތެރިން ކަމަށް ވެސް ނާގަލްސްމަން ބުންޏެވެ.

ޖަރުމަނުގެ ބަޔާން މިއުނިކަށް ކުޅެމުން އަންނަ މުސިއާލާ އަށް ޖަރުމަނު ޤައުމީ ޓީމުން ޖާގަ ލިބުނީ 2021 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް ޤައުމީ ޓީމަށް ކުޅެދިން 35 މެޗުގައި ހަ ލަނޑު ޖަހައިފަ އެވެ. ޖަރުމަނުގެ ބަޔާ ލެވަކޫސަންގައި ކުޅެމުން އަންނަ ވާޓްޒް ވެސް އަންނަނީ 2021 ވަނަ އަހަރުން ފެށިގެން ޤައުމީ ޓީމަށް ކުޅެމުންނެވެ. އޭނާ ވަނީ ޤައުމީ ޓީމަށް ކުޅެދިން 24 މެޗުން ހަތަރު ލަނޑު ޖަހައިފަ އެވެ.