ޔުއެފާ ނޭޝަންސް ލީގު އޭގެ، ގްރޫޕް ތިނެއްގައި ބޮސްނިއާއާ ދެކޮޅަށް ކުޅުނު މެޗުން ނެދަލެންޑްސް ފަސޭހަ މޮޅެއް ހޯދައިފި އެވެ.

ފިލިޕްސް ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު ނެދަލެންޑްސް އިން ކާމިޔާބު ކުރީ 5-2 އިންނެވެ. މެޗުގެ ފުރަތަމަ ހާފުގައި ނެދަލެންޑްސް އިން ދެ ލަނޑު ޖެހިއިރު، ބޮސްނިއާ އިން އެއް ލަނޑު ޖެހި އެވެ. އަދި ފަހު ހާފުގައި ނެދަލެންޑްސް އިން ތިން ލަނޑު ޖެހިއިރު، ބޮސްނިއާ އިން އެއް ލަނޑު ޖެހި އެވެ.

މެޗު ފަށައިގެން 13 ވަނަ މިނެޓުގައި ނެދަލެންޑްސް އަށް ލީޑު ނަގައިދިނީ ޖޯޝުއާ ޒާކްޒީ އެވެ. އޭގެ ފަހުން މެޗުގެ 27 ވަނަ މިނެޓުގައި ބޮސްނިއާ އިން ލަނޑު ޖަހައި ނަތީޖާ ހަމަހަމަ ކުރި އެވެ. އެ ޓީމަށް ނަތީޖާ ހަމަހަމަ ކޮށްދިނީ އެރްމެޑިން ޑެމިރޯވިޗް އެވެ. ނަމަވެސް ދެ ވަނަ ފަހަރަށް ނެދަލެންޑްސް އިން ލީޑު ނެގީ ފުރަތަމަ ހާފުގެ އިތުރު ވަގުތުގައި ޓިޖާނީ ރައިންޑާސް ޖެހި ލަނޑުންނެވެ.

ދެ ވަނަ ހާފުގައި ނެދަލެންޑްސްގެ ތިން ވަނަ ލަނޑު ޖެހީ ކޯޑީ ގަކްޕޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ރައިންޑާސް އެވެ. މެޗުގެ 73 ވަނަ މިނެޓުގައި ބޮސްނިއާގެ ދެ ވަނަ ލަނޑު ޖެހީ އެޑިން ޖެކޯ އެވެ. މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ނެދަލެންޑްސްގެ ހަތަރު ވަނަ ލަނޑު ޖެހީ ވައުޓް ވެގްހޯސްޓް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ޓީމުގެ ފަސް ވަނަ ލަނޑު ޖެހީ ޒަވީ ސިމޯންސް އެވެ.

މި ގުރޫޕުގައި ނެދަލެންޑްސްގެ ދެ ވަނަ މެޗުގައި އެ ޓީމު ނިކުންނާނީ ޖަރުމަނާ ދެކޮޅަށެވެ.