މިއަހަރުގެ ބެލެންޑިއޯ އެވޯޑުގެ އެންމެ މޮޅު ކޯޗުގެ މަޤާމަށް ވާދަކުރާ ކޯޗުންގެ ނަންތައް އިއުލާން ކޮށްފި އެވެ.
ފްރާންސް ފުޓުބޯޅަ އިން ދުނިޔޭގެ އެންމެ މޮޅު ކޯޗަށް ދެމުން އަންނަ އެވޯޑަށް ވާދަކުރަނީ ހަ ކޯޗުންނެވެ. އެއީ ބަޔާ ލެވަކޫސަންގެ ޒަބީ އަލޮންސޯ، ރެއާލް މެޑްރިޑުގެ ކާލޯ އަންޗެލޮޓީ، ސްޕެއިންގެ ޤައުމީ ޓީމުގެ ލުއިސް ޑި ލާ ފުއެންޓޭ، އެޓަލަންޓާގެ ޖިއާން ޕިއެރޯ ގަސްޕެރީނީ، މެންޗެސްޓަރ ސިޓީގެ ޕެޕް ގާޑިއޯލާ އަދި އާޖެންޓީނާ ޤައުމީ ޓީމުގެ ލިއޮނަލް ސްކަލޯނީ އެވެ.
މީގެ ތެރެއިން އަލޮންސޯ ވަނީ ލެވަކޫސަން އާއެކު މިދިޔަ ސީޒަންގައި ގިނަ ކާމިޔާބީތަކެއް ހޯދައިފަ އެވެ. އޭނާ ވަނީ ލެވަކޫސަން އާއެކު ޖަރުމަނު ލީގު، ޖަރުމަނު ކަޕް އަދި ޖަރުމަނު ސުޕަ ކަޕް ކާމިޔާބު ކޮށްފަ އެވެ. މީގެ އިތުރުން ޔުއެފާ ޔޫރޮޕާ ލީގުގެ ފައިނަލްގައި ވެސް ވަނީ ވާދަކޮށްފަ އެވެ.
އަންޗެލޮޓީ ވަނީ ރެއާލާ އެކު ސްޕެނިޝް ލީގުގެ އިތުރުން، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު އަދި ޔުއެފާ ސުޕަ ކަޕް ކާމިޔާބު ކޮށްފަ އެވެ. ފުއެންޓޭ ވަނީ ސްޕެއިން ޤައުމީ ޓީމާއެކު ޔުއެފާ ނޭޝަންސް ލީގު އަދި ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ. ގަސްޕެރީނީ ވަނީ އެޓަލަންޓާ އާއެކު ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ.
ގާޑިއޯލާ ވަނީ ސިޓީ އާއެކު އިނގިރޭސި ޕްރިމިއާ ލީގު، އެފްއޭ ކަޕް އަދި އެފްއޭ ކޮމިއުނިޓީ ޝީލްޑު ކާމިޔާބު ކޮށްފަ އެވެ. އާޖެންޓީނާ ޤައުމީ ޓީމަށް އިރުޝާދު ދެމުން އަންނަ ސްކަލޯނީ ވަނީ އެ ޓީމާ އެކު ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) ކާމިޔާބު ކޮށްފަ އެވެ.
