ކުޅިވަރަށް ހިދުމުގެ ދާއިރާއިން ގައުމީ ޝަރަފުވެރިކަން ކްލަބް ވެލެންސިއާގެ އަހުމަދު މުހައްމަދު (ދޮންތު) އަދި ވިކްޓަރީގެ ރިނބުދޫ އަހުމަދު ނާސިރަށް ދެއްވައިފި އެވެ.

ގައުމީ ދުވަހުގެ ރަސްމީ ޖަލްސާގައި މި ދެ ބޭފުޅުންނަށް މި އިނާމާއި ޝަރަފު އެރުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

އިނާމް ލިބިވަޑައިގެންނެވި ދޮންތު އަކީ ކްލަބް ވެލެންސިއާ އުފެއްދެވުމުގައި އިސް ދައުރެއް އަދާކުރެއްވި އެކުލަބުގެ އެންމެ ވަރުގަދަ އެއް ހިދުމަތްތެރިޔާ އެވެ. ދޮންތު ވަނީ ވެލެންސިއާގެ ޖެނެރަލް ސެކްރެޓަރީކަން 30 އަހަރު ކުރައްވައިފަ އެވެ. ވެލެންސިއާގެ އެންމެ ކާމިޔާބު ދުވަސްވަރު ފުޓްބޯޅަ ޓީމާއި ބާސްކެޓް ޓީމުގެ މެނޭޖަރުކަން ކުރެއްވި އެވެ. ކުޅުންތެރިއެއްގެ ގޮތުންނާއި ކޯޗެއްގެ ގޮތުން ބާސްކެޓް ޓީމު ހިންގަވައި ފުޓްބޯޅައިގެ ޓީމުގެ ހިންގެވުމުގައި ވެސް އިސް ދައުރެއް އަދާކުރެއްވި އެވެ. މި ގޮތުން ގައުމީ ފުޓްބޯޅަ މުބާރާތް 1993 ވަނަ އަހަރު ކާމިޔާބުކޮށް، ކަޕް ވިނާސް ކަޕް މިލްކުކުރި ޓީމުގެ މެނޭޖަރުކަން ވެސް އޭނާ ކުރެއްވި އެވެ.

ވެލެންސިއާ އަށް ފަހު ފުޓްބޯޅަ އެސޯސިއޭޝަން އޮފް މޯލްޑިވްސްގެ ގިނަ މަސައްކަތްތަކެއް ވެސް ދޮންތު ކުރެއްވި އެވެ. މި ގޮތުން އެންމެ ފުރަތަމަ އިންތިހާބުކުރި އެފްއޭއެމުގެ ފުރަތަމަ ދެ ދައުރުގައި ހިންގާ ކޮމިޓީގެ މެމްބަރުކަން ކުރައްވައި ރާއްޖޭގެ ގައުމީ ފުޓްސަލް ޓީމުގެ ހިންގުމުގައި ވެސް ދޮންތު މުހިންމު ދައުރެއް އަދާކުރެއްވި އެވެ.

ދޮންތު އަށް ޝަރަފުވެރިކަން ލިބިވަޑައިގަތުމުން އޭނާގެ ކުލަބު ވެލެންސިއާއިން ވަނީ ހޫނު މަރުހަބާއެއް ކިޔައިފަ އެވެ.

ނިއުރޭޑިއަންޓަށް ފަހު ވިކްޓަރީގައި މުހިންމު ދައުރެއް އަދާކުރެއްވި ނާބެ އަކީ ރާއްޖޭގެ އެންމެ ފުރަތަމަ ކުޅިވަރު ދަސްކޮށްދިން އިންސްޓަކްޓަރެވެ. ވިކްޓަރީ ސްޕޯޓްސް ވުޖޫދަށް ގެނުވި އެއް ބޭފުޅަކީ ރިނބުދޫ ނާސިރެވެ. ވިކްޓަރީގެ ކާމިޔާބު ހަޔާތުގެ ކުރިން އޭނާ ފެނިގެންދިޔައީ މާލޭ ޒަމާނީ މިއުޒިކް ކުލަބުންނެވެ. ފުޓްބޯޅަ އާއި ވޮލީ އަދި ބާސްކެޓާއި ހޮކީގެ އިތުރުން ކްރިކެޓާއި ހޮކީގައި ވެސް އޭނާއަކީ ފާހަގަކޮށްލެވުނު ކުޅުންތެރިއެކެވެ. އަދި ބައިސްކަލް ރޭހާގައި ސަގާފީ ކުޅިވަރެއް ކަމުގައިވާ މަންޑި ކުޅުމުގައި ވެސް ފާހަގަކޮށްލެވުނު ކުޅުންތެރިއެކެވެ.

ފުޓްބޯޅައިގައި ނާބެ އަކީ ފޯވަޑެކެވެ. ނަމަވެސް އޭނާގެ ދުވަސްވަރު ޑިފެންސަށް ކުޅޭ ކުޅުންތެރިން މަދުވުމުން ގިނަ މެޗުތަކުގައި އޭނާ އަށް ޖެހުނީ ފަހަތުގައި ޑިފެންސިވް މަގާމުތަކަށް ކުޅޭށެވެ. ނާބެ ބުނި ގޮތުގައި އޭގެ މައިގަނޑު ސަބަބަކީ ފަހަތަށް ކުޅެނިކޮށް ގޯލެއް ވަދެއްޖެނަމަ ކުޅުންތެރިން އޭގެ ޒިންމާނަގަން ބޭނުންނުވުމެވެ. މިހެންވެ ފަހަތަށް ކުޅޭ ކުޅުންތެރިން މަދުވުމުން، އެވަގުތެއްގައި ކޯޗު އެންމެ ބޭނުންވާ މަގާމަށް އޭނާ ކުޅެދެ އެވެ. މި ގޮތުން އެންމެ ހާއްސަ އެއް މުބާރާތަކީ 1979ގައި ރިޔޫނިއަންގައި އޮތް އިންޑިއަން އޯޝަން އައިލެންޑް ގޭމްސް އެވެ. އެ މުބާރާތް ކުޅުނު ޓީމުގެ ވައިސް ކެޕްޓަނަކީ އޭނާ އެވެ.