ދަގަނޑޭގެ ވަޒީފާ ޚަބަރާ އެކު އާޒިމާ ފާހަގަ ކުރެއްވީ މުހިންމު ނުކުތާތަކެއް!

ރާއްޖޭގައި ހުރި އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާޤު (ދަގަނޑޭ) އަށް ދިން ވަޒީފާއާ ގުޅޭ ގޮތުން، ކުރީގެ ބަންޑާރަ ނައިބު އަލްއުސްތާޛާ ޢައިޝަތު އާޒިމާ ޝަކޫރު މުހިންމު ނުކުތާތަކެއް ފާހަގަ ކުރައްވައިފި އެވެ.

ޤައުމީ ފެންވަރުގައި އަދި ކުލަބު ފެންވަރުގައި ވެސް މޮޅު ކުޅުމެއް ދައްކައި، ގިނަ ކާމިޔާބީތަކެއް ހޯދާފައިވާ ދަގަނޑޭ ހަމަޖައްސާފައި ވަނީ ރައްޔިތުންގެ މަޖިލީހުގެ ރައީސް އަބްދުއް ރަހީމް ޢަބްދުﷲ (އަދުރޭ) ދިރިއުޅުއްވަމުން އަންނަ މުރައިދޫ ގޭގެ ޑިރެކްޓަރ ޖެނަރަލްގެ މަޤާމަށެވެ. މިދިޔަ ޖުލައި މަހުން ފެށިގެން ރަސްމީކޮށް ދަގަނޑޭ ވަޒީފާ އަށް ނިކުންނަމުން އަންނައިރު، އޭނާގެ މައިގަނޑު މަސައްކަތަކަށް އޮންނަނީ މަޖިލީހުގެ ރައީސް ޕްރޮޓޮކޯލްގެ ކަންކަން ބެލެހެއްޓުމާއި، އިދާރީ ގޮތުން ބަލަހައްޓަން ޖެހޭ ކަންކަން ބެލެހެއްޓުން ކަމަށް މައުލޫމާތު ލިބިފައިވެ އެވެ.

އެ ޚަބަރު ސޯޝަލް މީޑިއާގެ ޕްލެޓްފޯމެއް ކަަމަަށްވާ ފޭސްބުކްގައި ހިއްސާ ކުރެއްވުމަށްފަހު އާޒިމާ ވިދާޅުވީ، އަޝްފާޤަކީ ޤައުމަށް ބޮޑެތި ޝަރަފުތަކެއް ހޯއްދަވައި ދެއްވައި، މުޅި ޤައުމުގެ އެންމެންގެ ލޯތްބާއި އިޙުތިރާމް ލިބިގެންވާ ޝަޚުޞިއްޔަތެއް ކަމަށެވެ. އާޒިމާ ވިދާޅުވީ އެފަދަ ބޭފުޅުންނަށް ސިޔާސީ މަޤާމުތަކަށް ދާން މަޖުބޫރު ނުވާނެ ގޮތަކަށް ކަންކަން ހަމަޖެހިފައި ހުންނަން ޖެހޭނެ ކަމަށް ޤަބޫލު ކުރައްވާ ކަމަށެވެ. އަދި މިހާރު އަޝްފާޤަށް ދީފައިވާ ވަޒީފާގެ މަޤާމަކީ، ދިވެހި ޤައުމުގައި އަޝްފާޤަށް އެންމެ އެކަށޭނަ މަޤާމަށްވުރެ ދަށް މަޤާމެއް ކަމަށް ދެކިލައްވާ ކަމަށް ވެސް އާޒިމާ ވަނީ ވިދާޅުވެފަ އެވެ.

މީގެ އިތުރުން އާޒިމާ ވިދާޅުވީ އަޝްފާޤަށް ވަޒީފާ ނުވަތަ މަޤާމެއް ދިނުން އެއީ އެންމެ ރަނގަޅު ކަމެއްގެ ގޮތުގައި ވެސް ދެކޭ ކަމަށެވެ. އެހެނީ އަޝްފާޤަކީ ދިވެޖި ޤައުމީ ދިދަ އޭގެ އެންމެ ޝަރަފުވެރި މަޤާމަށް ގެންގޮސްދީފައިވާ ކައްޕިތާނު ކަމަށް ވެސް އާޒިމާ ފާހަގަ ކުރެއްވި އެވެ. އެކަން ފާހަގަ ކުރައްވައި އާޒިމާ އަޝްފާޤު ސިފަ ކުރެއްވީ ދިވެހި ޤައުމުގެ "އައިކަން"ގެ ގޮތުގަ އެވެ. އެހެންކަމުން އަޝްފާޤަށް ދެވޭ ވަޒީފާ އަކީ އަޝްފާޤަށް ޤައުމުގައި ލިބިފައިވާ ޚާއްސަ ކަމާއި، އަޝްފާޤުގެ ދާއިރާ އާއި، އަޝްފާޤުގެ ޝަރަފާއި އެއް ފެންވަރުގެ ވަޒީފާ އަކަށް ވާން ޖެހޭނެ ކަމުގައި ދެކިލައްވާ ކަމަށް ވެސް އާޒިމާ ވިދާޅުވެފައިވެ އެވެ.

ޕޯސްޓު ނިންމަވާލައްވަމުން އާޒިމާ ވިދާލުވީ އެއީ އެހެން އެއްވެސް ބޭފުޅަކަށް ލިބިވަޑައިގެންނެވި ވަޒީފާ އަކާ ބެހޭ ޕޯސްޓެއް ނޫން ކަމަށެވެ. އަދި އެ ޕޯސްޓަކީ އަޝްފާޤު ދިވެހި ޤައުމަށް ކޮށްދީފައިވާ ޚިދުމަތާއި، އަޝްފާޤަށް ޝުކުރު އަދާ ކުރުމާ ގުޅޭ ޕޯސްޓެއް ކަމަށެވެ.

މުރައިދޫ ގެ އަކީ ރައްޔިތުންގެ މަޖިލީހުގެ ރައީސަކަށް ހުންނަވާ ބޭފުޅަކު ދިރިއުޅުއްވުމަށް ޚާއްސަކޮށްފައިވާ ދެކޮޅެވެ. ރައްޔިތުންގެ މަޖިލީހުގެ ރައީސަކު ރަސްމީކޮށް މުރައިދޫ ގެ ބޭނުން ކުރަން ފެއްޓެވީ 2021 ވަނަ އަހަރު އެވެ. އެއީ އޭރު ރައްޔިތުންގެ މަޖިލީހުގެ ރައީސަކަށް ހުންނެވި، ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ބޮމުގެ ހަމަލާގެ ސަބަބުން، އެމަނިކުފާނުގެ ސަލާމަތީ ކަންކަން ވަރުގަދަ ކުރެއްވުމުގެ ގޮތުންނެވެ. އޭގެ ފަހުން ރައްޔިތުންގެ މަޖިލީހުގެ ރައީސްކަމަށް ވަޑައިގެންނެވި މުޙައްމަދު އަސްލަމް އެ ގެކޮޅު ބޭނުމެއް ނުކުރައްވަ އެވެ.

ވިހި ވަނަ ރައްޔިތުންގެ މަޖިލީހުގެ ރައީސަކަށް އަދުރޭ ވަޑައިގެންނެވުމަށްފަހު، ރަސްމީކޮށް މުރައިދޫ ގެއަށް ބަދަލުވެ ވަޑައިގަތުމުގެ ކުރިން އެ ގެކޮޅު ވަނީ މަރާމާތު ވެސް ކޮށްފަ އެވެ.