ނިއުކްލިއަރ ހަކަތައިގެ ކަންކަން ބަލަހައްޓާ އައިއޭއީއޭގައި ރާއްޖެއިން ބައިވެރިވުމަށް ރައީސް ނިންމަވައިފި
2 ސެޕްޓެމްބަރު 2024 | ހޯމަ 06:59އެގޮތަށް ނިންމެވީ މިނިސްޓްރީ އޮފް ފޮރިން އެފެއާޒުން ވަޒީރުންގެ މަޖިލީހަށް ހުށަހެޅުއްވި ކަރުދާހަށް މަޝްވަރާކުރެއްވުމަށް ފަހު
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު
އިންޓަރނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) ގައި ދިވެހިރާއްޖެއިން ބައިވެރިވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.
ރައީސް އޮފީހުން ބުނީ، މިކަމަކީ ޤާނޫނުއަސާސީގެ 93 ވަނަ މާއްދާގެ (ހ) ގެ ދަށުން ރައްޔިތުންގެ މަޖިލީހުގެ ރުހުން ހޯދަންޖެހޭ ކަމަކަށްވާތީ، އެ މަޖިލީހުގެ ރުހުން ހޯދުމަށްޓަކައި ހުށަހެޅުއްވުމަށް ރައީސުލްޖުމްހޫރިއްޔާ ނިންމަވާފައިވާ ކަމަށެވެ.
މިގޮތަށް ނިންމެވީ މި މަޝްރޫޢު އިތުރަށް ކުރިއަށް ގެންދާނެ ގޮތަކާ ގުޅޭގޮތުން މިނިސްޓްރީ އޮފް ފޮރިން އެފެއާޒުން ވަޒީރުންގެ މަޖިލީހަށް ހުށަހެޅުއްވި ކަރުދާހަށް މަޝްވަރާކުރެއްވުމަށް ފަހުގައެވެ.
ރައީސުލްޖުމްހޫރިއްޔާގެ މި ނިންމެވުމާ ގުޅޭގޮތުން ނޫސްވެރިންނަށް މަޢުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި އާދިއްތަ ދުވަހު ނޫސްވެރިންގެ ބައްދަލުކުރެއްވުމެއްވެސް ކުރިއަށް ދިޔައެވެ.
އެހެންނަމަވެސް މިފަދަ ދަނޑިވަޅެއްގައި (އައި.އޭ.އީ.އޭ) ގައި ބައިވެރިވުމުގެ ޒަރޫރަތަކީ ކޮބައިކަން ސާފުކޮށްދެވިފައެއް ނުވެއެވެ.
އިންޓަރނޭޝަނަލް އެޓޮމިކް އެނަރޖީ އޭޖެންސީއަކީ 1957 ވަނަ އަހަރު ޤާއިމު ކުރެވުނު ބައިނަލްއަޤުވާމީ އޮގަނައިޒޭޝަނެކެވެ. މިއީ ނިއުކްލިއަރ ހަކަތަ އުފެއްދުމުގެ ކަންކަން ރެގިއުލޭޓްކޮށް، މިންގަނޑުތަކާ އެއްގޮތަށް ނިއުކްލިއަރ ހަކަތަ އުފައްދާކަން ކަށަވަރު ކުރުމާއި، އަސްކަރީ ބޭނުންތަކަށް ނިއުކްލިއަރ ހަކަތަ ބޭނުން ނުކުރާކަން ކަށަވަރު ކުރުން ފަދަ ކަންކަމަށް އެކުލަވާލާފައިވާ ތަނެކެވެ.
