ސިންގަޕޫރުގައި ރައީސްގެ ފޮޓޯ ނެގި ދިވެއްސެއްގެ ފޯނު ހިފަހައްޓައިފި
1 ސެޕްޓެމްބަރު 2024 | އާދީއްތަ 08:21އޭނާގެ ފޯނު ކޯޓު އަމުރެއްގެ ދަށުން ހިފަހައްޓާފައިވަނީ އޭނާ ރާއްޖެ އައިސް ފްލައިޓުން ފޭބި ވަގުތު
ރައީސް ޑރ. މުހައްމަދު މުއިއްޒު އާއިލާއާއެކު ސިންގަޕޫރުގައި
ރައީސް ޑރ މުޙައްމަދު މުއިއްޒު ސިންގަޕޫރަށް ކުރެއްވި އަމިއްލަ ދަތުރުފުޅުގެ ތެރެއިން އެމަނިކުފާނުގެ ފޮޓޯއެއް ނެގި މައްސަލައެއްގައި ދިވެއްސެއްގެ ފޯނު ހިފަހައްޓައިފިއެވެ.
އޭނާގެ ފޯނު ކޯޓު އަމުރެއްގެ ދަށުން ހިފަހައްޓާފައިވަނީ އޭނާ ރާއްޖެ އައިސް ފްލައިޓުން ފޭބި ވަގުތުއެވެ.
އެކަމާ ގުޅޭގޮތުން ފުލުހުންނާ ސުވާލު ކުރުމުން ފުލުހުންވެސް ވަނީ އެކަން ކަށަވަރު ކޮށްދީފައެވެ.
އެ ފޮޓޯ އާންމުކުރީ ޓްވިޓަރ އެކައުންޓަކުންނެވެ. ފޮޓޯގައި ފެންނަނީ ރައީސް މުއިއްޒު އާއިލާއާއެކު ޝޮޕިންގ މޯލެއްގައި ހުންނަވާ މަންޒަރެވެ. އަރިހުގައި ސިފައިންވެސް ތިބެއެވެ.
އެ ފޮޓޯ ތަކުގައި ފެންނަ އެސްޕީޖީ އިން ގެ އަތުގައި ގިނަ ޝޮޕިންގ ބޭގް ހުރިކަން އެ ފޮޓޯތަކަށް ކޮމެންޓް ކުރި ބައެއް މީހުން ވަނީ ފާހަގަ ކޮށްފައިވެއެވެ.
ޑޮކްޓަރަށް ދައްކަވަން ސިންގަޕޫރަށްކުރެއްވި ދަތުރުފުޅު ނިންމަވައިލެއްވުމަށް ފަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ބުދަ ދުވަހުގެ ރޭ ވަނީ ރާއްޖެ ވަޑައިގެންފައެވެ.
