ޓީމެއްގެ ގޮތުގައި މަސައްކަތް ކުރެވޭނީ ޑިފެންޑަރުންނާއި ފޯވާޑުން އެކުވެގެން: އަންޗެލޮޓީ

ސްޕެނިޝް ލީގުގެ ތިން ވަނަ މެޗަށް ރެއާލް މެޑްރިޑު ކުރިމަތިލާއިރު، ޓީމެއްގެ ގޮތުގައި މަސައްކަތް ކުރަން ޖެހޭ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އައު ސީޒަންގެ ސްޕެނިޝް ލީގުގައި ރެއާލުން ކުޅުނު ފުރަތަމަ މެޗުގައި އެ ޓީމު ވަނީ އެއްވަރުވެފަ އެވެ. ދެ ވަނަ މެޗުން ރެއާލް މޮޅުވެފައިވާއިރު، ތިން ވަނަ މެޗުގައި ބުރާސްފަތި ދުވަހުގެ ރޭ ނިކުންނާނީ ލަސް ޕަލްމާސްއާ ދެކޮޅަށެވެ.

އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން މިދިޔަ ސީޒަންގެ ސްޕެނިޝް ލީގު ރެއާލަށް ކާމިޔާބުކޮށްދިން އަންޗެލޮޓީ ބުނީ، ޓީމެއްގެ ގޮތުގައި ރެއާލްގެ ކުޅުންތެރިން މަސައްކަތް ކުރަން ޖެހޭ ކަމަށެވެ. އަދި އެކަން ކުރެވޭނީ ރެއާލްގެ ޑިފެންޑަރުންނާއި، ފޯވާޑުން އެކުވެގެން ކުރާ މަސައްކަތުން ކަމަށް ވެސް އޭނާ ވަނީ ބުނެފަ އެވެ.

ލަސް ޕަލްމާސްގެ ދަނޑުގައި އެ ޓީމާ ދެކޮޅަށް ކުޅޭ މެޗަކީ ވާދަވެރި އަދި އުނދަގޫ މެޗަކަށް ވާނެ ކަމަށް ވެސް އަންޗެލޮޓީ ބުންޏެވެ. ޚާއްސަކޮށް އައު ސީޒަންގެ ކުރީކޮޅު ކުޅެން ޖެހޭ މެޗުތައް ވަރުގަދަ ވާނެ ކަމަށާއި، އުނދަގޫ ވާނެ ކަމަށް ވެސް އޭނާ ވަނީ ފާހަގަ ކޮށްފަ އެވެ. އެހެންކަމުން ލަސް ޕަލްމާސްގެ މެޗު ވެސް އޭނާ އަށް ސިފަ ކުރެވެނީ އެގޮތަށްކަން ފާހަގަކޮށް އަންޗެލޮޓީ ބުނީ، އޭނާ އުންމީދު ކުރަނީ ހުޅުވާލެވިގެން ކުޅެވޭ، ޝައުޤުވެރި މެޗަކަށް ކަމަށެވެ.

ކޮންމެ އަހަރަކު ވެސް ރެއާލަށް އޮންނަ ޗެލެންޖު ބަދަލުވާ ކަމަށާއި، އެކަން އެހެން ދިމާވަނީ ކޮންމެ އަހަރކު ވެސް ޓީމަށް އަދި ޓީމުގެ އޮނިގަނޑަށް ބަދަލުތަކެއް އަންނާތީ ކަމަށް އަންޗެލޮޓީ ބުންޏެވެ. މިދިޔަ އަހަރަށް ބަލާއިރު އެންމެ ބޮޑަށް ބޭނުން ވެފައި އޮތީ ވަގުތު ކަމަށާއި، ބައެއް މެޗުތަކުގެ އެންމެ ފަހު ވަގުތު ރެއާލް މޮޅުވެފައިވާކަން އޭނާ ވަނީ ފާހަގަ ކޮށްފަ އެވެ. އެހެންކަމުން ރެއާލްގެ އެންމެ ފުރިހަމަ މާނައިގައި ފެންނަން މިއަހަރު ވެސް އުނދަގޫތަކެއް ކުރިމަތިވާނެ ކަމަށް އޭނާ ބުންޏެވެ.

ލަސް ޕަލްމާސްގެ ދަނޑުގައި ރެއާލުން އެ ޓީމާ ދެކޮޅަށް ނިކުންނާނީ ބުރާސްފަތި ދުވަހުގެ ރޭ ދަންވަރު ރާއްޖެ ގަޑިން 12:30 ގައެވެ.