ފެހި ސިގްނަލްގައި ވަޑައިގެން 100 ދުވަސްވި ފަހުން ރަތްބޮކި ދިއްލި ގޯސްކުރުވަން އުޅެނީ ކުރީ ސަރުކާރު - ރިޔާޒު މަންސޫރު

ރައީސް ޑރ. މުހައްމަދު މުއިއްޒު ފެހި ސިގްނަލްގައި ވަޑައިގެން 100 ދުވަސްވި ފަހުން ރަތްބޮކި ދިއްލި ގޯސްކުރުވަން އުޅެނީ ކުރީ ސަރުކާރު ކަމަށް އެމްޑީޕީގެ އެސްއެމްއީ ކޮމިޓީގެ މުގައްރިރު ރިޔާޒު މަންސޫރު ވިދާޅުވެއްޖެއެވެ.

އެމްޑީޕީ ޕެނަލް ޑިސްކަޝަން ހަވަރުބެރުގައި ވާހަކަދައްކަވަމުން އެމްޑީޕީގެ އެސްއެމްއީ ކޮމިޓީގެ މުގައްރިރު ރިޔާޒު މަންސޫރު ވިދާޅުވީ ރައީސް މުއިއްޒު ކެންޑިޑޭޓަކަށް ހުންނެވި އިރު މުޅިންވެސް ލިބުނީ ފެހި ސިގްނަލް ކަމަށެވެ. ދަރަނީގެ ވާހަކަ ދައްކަވާފައި އެއީ އެއްވެސް މައްސަލައެއް ނޫން ކަމަށް ވިދާޅުވަމުން ގެންދެވި ކަމަށެވެ. އެއްވެސް މައްސަލައެއް ނެތި ވަރަށް ޔަގީންކަމާއެކު ވަޑައިގެންނެވި ކަމަށާއި، އެނޫން ސިނާރިއޯއެއްވެސް ނެތް ކަމަށެވެ.

Advertisement

ނަމަވެސް ވެރިކަމަށް ވަޑައިގެން ފުރަތަމަ 100 ދުވަހު ކުރި ކަންކަމަށް ބަލާއިރު، ދަރަނީގެ ވާހަކައާއި ދަތިކަމުގެ ވާހަކައާއި މާލީ ވާހަކައެއްވެސް ނުދައްކަވާ ކަމަށެވެ. ދައްކަވަމުން ގެންދެވީ އެއަރ އެމްބިއުލާންސްގެ ވާހަކައާއި، އާސަންދައިން ބެންކޮކަށާއި، ދުބާއީއަށް ލިބޭނެ ވާހަކަ ކަމަށެވެ. ދެން ދެއްކެވީ 35 މިލިއަން ޑޮލަރު ދީފައި ޑްރޯން ގަތް ވާހަކަ ދެއްކެވި ކަމަށާއި، އެކުވެރި އިންޑިއާއަށް 50 މިލިއަން ޑޮލަރު ދައްކަން ނުޖެހޭ އިރުވެސް ދެއްކި ކަމަށެވެ.

ފެނަލް ޑިސްކަޝަންގައި ވާހަކަ ދައްކަވަމުން ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވީ އިގްތިސާދީ މާބޮޑު ދަތިކަމެއް ނެތް ކަމަށެވެ. މިއުޅެނީ ވެރިކަމުގައި ތިބި މީހުންގެ ނާގާބިލުކަމާއި، ގައުމެއްގެ ގޮތުގައި ގައުމެއް ހިންގުމުގެ އެއްވެސް ކަހަލަ ތަޖުރިބާއެއް ނެތިގެން ކަމަށެވެ.

އަމީން ވިދާޅުވީ ވޭތުވެދިޔަ ސަރުކާރުތަކުން ފުރަތަމަ ދެތިން މަސް ދުވަހުގެ ތެރޭގައި 200، 300 މިލިއަން ޑޮލަރު ހޯދާ ކަމަށާއި، ނަމަވެސް މި ސަރުކާރަށް 5 މިލިއަން ޑޮލަރު ހޯދުމުން އެވީކަމަށް ދެކޭ ކަމަށެވެ.