ވެސްޓަން މެކެނީ، ޔުވެންޓަސްގެ އެއްބަސްވުން އައު ކޮށްފި
24 އޯގަސްޓު 2024 | ހޮނިހިރު 07:21އެ ކުލަބުގެ އެއްބަސްވުން އޭނާ އައު ކޮށްފައި ވަނީ އިތުރު އެއް އަހަރުގެ މުއްދަތަކަށެވެ.
ޔުވެންޓަސް އަށް ކުޅެމުން އަންނަ ވެސްޓަން މެކެނީ
އިޓާލިއަން ލީގުގެ ޔުވެންޓަސް އަށް ކުޅެމުން އައި ވެސްޓަން މެކެނީ، އެ ކުލަބުގެ އެއްބަސްވުން އައު ކޮށްފި އެވެ.
އުމުރުން 25 އަހަރުގެ ކުޅުންތެރިޔާ އެންމެ ފުރަތަމަ ޔުވެންޓަސް އަށް ބަދަލުވީ ލޯނު އެއްބަސްވުމެއްގެ ދަށުން 2020 ވަނަ އަހަރު އެވެ. އެއް އަހަރުގެ އެ އެއްބަސްވުން ހަމަވުމާއެކު، 2021 ވަނަ އަހަރު ޔުވެންޓަސް އިން ވަނީ އޭނާ އާއެކު ދާއިމީ އެއްބަސްވުމެއް އެކުލަވާލައި، ސޮއި ކޮށްފަ އެވެ. އެ ކުލަބާ އެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ.
އެއްބަސްވުމުގައި ބާކީ އެއް އަހަރު އޮއްވައި، މެކެނީ ވަނީ ޔުވެންޓަސްގެ އެއްބަސްވުން އައު ކޮށްފަ އެވެ. އެ ކުލަބުގެ އެއްބަސްވުން އޭނާ އައު ކޮށްފައި ވަނީ އިތުރު އެއް އަހަރުގެ މުއްދަތަކަށެވެ. އެހެންކަމުން، ޔުވެންޓަސް އާއެކު މެކެނީ މިހާރު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.
މެކެނީ ވަނީ ޔުވެންޓަސް އަށް ކުޅެދިން 103 މެޗުގައި އަށް ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ އިޓާލިއަން ކަޕް ދެ ފަހަރު އަދި އިޓާލިއަން ސުޕަ ކަޕް އެއް ފަހަރު ކާމިޔާބު ކޮށްފަ އެވެ.
