ލާމަރުކަޒީ ނިޒާމް ސަލާމަތްކުރަން ނުކުންނަން ޖެހޭ ކަމަށާއި މާދަމާ އަށް މަޑުކޮށްފި ނަމަ ގެއްލޭނީ ހަމައެކަނި ކައުންސިލްތައް ނޫން ކަމަށާއި ރަށް ވެސް ނޮއޮންނަ ހިސާބަށް ކަންކަން ހިނގައިދާނެ ކަަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ބުރާސްފަތި ދުވަހުގެ ރޭގެ އެމްޑީޕީ ހަރުގެ ޖަލްސާގައި ވާހަކަދައްކަވަމުންނެވެ. ޒިޔާދު ވިދާޅުވި ސަރުކާރުން ޤަބޫލުކުރާ ގޮތުގައި އަތޮޅު ތެރޭގެ ރަށްރަށަށް ކޮށްދޭން ޖެހޭ ކަންކަމަކީ ބުރައެއް ކަމަށެވެ. އެކަން ސަރުކާރުގެ ޢަމަލުތަކުން އެނގޭ ކަމަށް އޭނާ ވިދާޅުވިއެވެ. އެގޮތުން ޕީޕީއެމް ޕީއެންސީގެ ވެރިކަންތަކުން ފެންނަ ގޮތުގައި ވެރިކަން ކުރުމަށް އެ ބޭފުޅުންނަށް ދިމާވާ އެންމެ ބޮޑު ގޮންޖެހުމަކީ ކަންކަމަށް ބޭނުންވެގެން އަތޮޅުތަކުގެ ކައުންސިލަރުންނާއި ރައްޔިތުން އެދޭ އެދުން ކަމަށް ވެސް އޭނާ ވިދާޅުވިއެވެ. މިއަދު ރައީސް ޑރ.މުހައްމަދު މުއިއްޒުގެ އެދިލެއްވުމާއި އެކު ރާއްޖޭގައި ކަތީބު ނިޒާމް އިއާދަކުރުމާއި މެދު ފެންނަ ގޮތް ބެލުމަށް ސަރވޭއެއް ވެސް ކުރަމުންދާކަމަށް ޒިޔާދު ވިދާޅުވިއެވެ.
ޒޔާދު ވަނީ ކަތީބު ނިޒާމް އޮތުމުން ރައީސް އައްޔަންކުރައްވާ މާލޭ ބޭފުޅަކު އަތޮޅެއްގެ ކަތީބަކަށް ހުރުމަށް ފުރުސަތު ލިބޭ ކަމަށާއި އެކަމުގެ ސަބަބުން އެ މީހާ އަކީ އެ އަތޮޅެއްގެ އިހުސާސްތައް އެނގޭ މީހަކަށް ނުވާ ކަމަށް ވިދާޅުވެފައެވެ. އަތޮޅުގެ ކަންކަން ނިންމުމަށް ކައުންސިލަރުން ހޮވާ ރައްޔިތުންނަށް ބަސް ބުނެވޭނެ މަގު ހޯދީ އެ ސަބަބާއި ހުރެ ކަމަށް ވެސް އޭނާ ވަނީ ވިދާޅުވެފައެވެ. މިއަދު ރައްޔިތުން ނުކުމެ ލާމަރުކަޒީ ނިޒާމް ހަރުދަނާކުރުމަށް އަޑު އުފުލަން ޖެހޭ ހާލަތަށް ކަންކަން ގޮސްފައިވާ ކަމަށް އޭނާ ވިދާޅުވިއެވެ. ސަރުކާރުގެ މުޅި ވިސްނުމަކީ ސަރުކާރުގެ ބެލުމުގެ ދަށަށް ކައުންސިލްތައް ގެނައުން ކަމަށާއި އެކަން ކުރުމަށް ޤާނޫނަށް ބަދަލު ނުގެނެސް އެކަން ކުރެވޭނެ އެހެން ގޮތެއް ހޯދަނީ ރައްޔިތުންނަށް އޮޅުވާލުމަށް ކަމަށް އޭނާ ވިދާޅުވިއެވެ.
އޭނާ ވިދާޅުވީ އަރބަން ޑިވެލޮޕްމެންޓް ބިލުގެ އެއް މާއްދާ އޮތީ މުޅި ލާމަރުކަޒީ ޤާނޫނު އުވޭ ގޮތަށް ކަމަށެވެ. ކައުންސިލްތަކުން ޕަރފޯމް ކުރާ ގޮތް ފެނުމުން އެކަން ސަރުކާރަށް ބަލައި ނުގަނެވޭ ކަމަށް އޭނާ ވިދާޅުވިއެވެ.
