މި އެގްރިމެންޓާ ގުޅޭގޮތުން ސަރުކާރުން ރައްޔިތުންނަށް ސާފު މައުލޫމާތެއް ނުދޭ
ޕީޕީއެމުން ބޭއްވި ޖަލްސާއެއްގައި ކުރީގެ ރައީސް އަބްދުﷲ ޔާމީނު ވާހަކަ ދައްކަވަނީ
ހެޔޮ ބަސްއަހާ ހެޔޮ ބަސް ގަބޫލުކުރާ މި ސަރުކާރުގެ އެންމެ ބޮޑު މައްސަލައަކީ އެއްވެސް ކަމެއްގައި ތެދު މައުލޫމާތު ރައްޔިތުންނަށް ނުދިނުން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގައި އޯޑިއަންސްގައި އިންނަވައި ޔާމީން ވަނީ އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް) އާއި ޔޫރަޕިއަން ޔޫނިއަން (އީޔޫ) އާ ދެމެދު ގާއިމުކޮށްފައިވާ "ސަމޯއާ އެގްރީމަންޓް" އަށް އަލިއަޅުއްވާލައްވާ ވާހަކަދައްކަވާފައެވެ. މި އެގްރިމެންޓަކީ އިސްލާމް ދީނާ ހިލާފު ގިނަ ކަންތައްތަކެއް އެކުލެވޭ އެގްރިމެންޓެއް ކަމަށާއި، ދުނިޔޭގެ މަޝްހޫރު ހުރިހާ ދީނީ އިލްމުވެރިންނާއި، ދީނީ އެކިއެކި މުއައްސަސާތަކުން ފާޑު ކިޔާފައިވާ އެގްރިމެންޓެއް ކަމަށް ޔާމީން ވިދާޅުވިއެވެ.
ޔާމީން ވިދާޅުވީ މި އެގްރިމެންޓާ ގުޅޭގޮތުން މިއަދުގެ ސަރުކާރުން ރައްޔިތުންނަށް ސާފު މައުލޫމާތު ނުދޭ ކަމަށެވެ. އަދި ހެޔޮ ބަސްއަހާ ހެޔޮ ބަސް ގަބޫލުކުރާ މި ސަރުކާރުގެ އެންމެ ބޮޑު މައްސަލައަކީ އެއްވެސް ކަމެއްގައި ތެދު މައުލޫމާތު ރައްޔިތުންނަށް ނުދިނުން ކަމަށް ޔާމީން ވިދާޅުވިއެވެ.
މީގެ އިތުރުން ޔާމީން ވިދާޅުވީ މި އެގްރިމެންޓާ ދެކޮޅަށް ދިވެހި ރައްޔިތުން ނުކުންނަންޖެހޭ ކަމަށެވެ.
ސަމޯއާ އެގްރިމެންޓްގެ ހަގީގަތް އޮޅުވާލުމަށް މިސަރުކާރުން މަސައްކަތް ކުރާ ކަމަށް މީގެ ކުރިން ވެސް ޔާމީން ވިދާޅުވެފައިވެއެވެ. ޔާމީން ވިދާޅުވީ ހަގީގަތް ހާމަކުރުމަށް ސަރުކާރުން ދެކޮޅު ހެދި ނަމަވެސް މި އެގްރިމެންޓްގެ ނުރައްކާތެރިކަން ދިވެހިންނަށް ސާފުކޮށްދޭނެ ކަމަށެވެ.
އެގޮތުން ސަމޯއާ އެގްރިމެންޓަކީ އޭޝިއާ، ކެރިބިއަން، ޕެސިފިކް ގައުމުތަކުގެ މެދުގައި ސޮއިކޮށްފައިވާ އެއްބަސްވުމެއް ކަަމަށާއި އެއީ އާ އެއްބަސްވުމެއް ނޫން ކަމަށް ޔާމީން ވިދާޅުވިއެވެ. އަދި ވިދާޅުވީ އެއީ ކުރިން ކޮލޮނައިޒްކޮށްފައި އޮތް ގައުމުތަކަށް ޚާއްސަވެގެން އުފެދުނު އެއްބަސްވުމެއް ކަމަށާއި. މިއީ ޔޫރަޕުން އޭރު އިސްތިއުމާރުކޮށްފައި ހުރި ގައުމުތަކަށް ވަކި ހިއްޕާފައި އޮންނަ އޮތުން ނިމުމަކަށް އަޔަ ނުދިނުމަށް ކުރި ކަމެއް ކަމަށެވެ.
ސަމޯއާ އެގްރީމަންޓް ގައި ރާއްޖެއިން ސޮއިކޮށްފައިވަނީ 1 ޖުލައި 2024 ގައެވެ.
އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ބެލްޖިއަމަށް ރާއްޖެއިން ކަނޑައަޅުއްވާފައި ހުންނަވާ ސަފީރު، ޤީލާ އަލީއެވެ.
