ނޭޝަނަލް ހެލްތް ލެބޯޓަރީގެ މަސައްކަތް ކުރިއަށްދޭ، މި ލެބޯޓަރީ ގާއިމްކުރަނީ ހުޅުމާލޭގައި: މިނިސްޓަރު ހަލީލު
22 އޯގަސްޓު 2024 | ބުރާސްފަތި 13:02ހުޅުމާލޭގެ ފުރަތަމަ ފިޔަވަހިން ވަނީ ބިމެއް ހަމަޖެހިފައި
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުވައި ހެލްތް މިނިސްޓަރު އަބްދުﷲ ހަލީލް ވާހަކަދައްކަވަނީ
ކާބޯތަކެތީގެ ރައްކާތެރިކަން ކަށަވަރުކުރުމަށް ގާއިމްކުރާ ނޭޝަނަލް ހެލްތް ލެބޯޓަރީގެ މަސައްކަތްތައް ކުރިއަށްދާ ކަމަށް ހެލްތް މިނިސްޓަރު އަބްދުﷲ ހަލީލް ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުވައި މިނިސްޓަރު ހަލީލު ވިދާޅުވީ ނޭޝަނަލް ހެލްތް ލެބޯޓަރީގެ ގާއިމް ކުރުމަށް ކުރަންޖެހޭ މަސައްކަތްތައް ކުރިއަށްދާ ކަމަށެވެ. އެގޮތުން މިހާރު ކުރިއަށްދަނީ ޑިޒައިން ކުރުމަށް ބަޔަކާ ހަވާލުކުރުމުގެ މަސައްކަތް ކަމަށާއި، ވަރަށް އަވަހަށް އެމަސައްކަތް ހަވާލުކުރެވޭނެ ކަމަށް މިނިސްޓަރު ހަލީލު ވިދާޅުވިއެވެ.
މިނިސްޓަރު ހަލީލު ވިދާޅުވީ މި ލެބޯޓަރީ ގާއިމް ކުރުމަށް މިހާރު ހުޅުމާލެއިން ބިމެއް ހަމަޖެހިފައިވާ ކަމަށެވެ. މި ލެބޯޓަރީ ވެގެންދަނީ ރާއްޖޭގެ އެންމެފަތީ ފެންވަރުގެ ޓެސްޓުތައް ހެދޭނެ އެންމެ ޒަމާނީ ފެންވަރުގެ ލެބޯޓަރީއަށް ކަމަށް މިނިސްޓަރު ހަލީލު ވިދާޅުވިއެވެ.
ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން، ރާއްޖެއަށް އިމްޕޯޓްކުރާ ނުވަތަ ރާއްޖެއިން އެކްސްޕޯޓްކުރާ ކާބޯތަކެއްޗާއި ރާއްޖޭގައި އުފައްދާ ކާބޯތަކެތި ޓެސްޓު ކުރެވޭނެ އިންތިޒާމު ގާއިމުކުރަންޖެހެއެވެ. އަދި ކާބޯތަކެތި އުފައްދާ އަދި ބަންދުކުރާ ތަންތަނާއި ގުދަންކުރާ ތަންތަނާއި ރައްކާކުރާ ތަންތަނުގެ އިތުރުން ކާބޯތަކެތި ވިއްކާ ތަންތަނުގެ ސިއްހީ ރައްކާތެރިކަން ބެލުމަށް ކުރަންޖެހޭ ތަހުލީލުތައް ކުރެވޭނެ އިންތިޒާމު ވެސް މި ލެބޯޓަރީގައި ހުންނަންޖެހޭނެއެވެ.
ރާއްޖެއަށް އެތެރެކުރާ ބާވަތްތައް ޓެސްޓު ކުރެވޭ މެކޭނިޒަމެއް ގާއިމްކުރާނެކަން ފާހަގަކުރައްވައި މިނިސްޓަރު ހަލީލު ވިދާޅުވީ މިހާރު ވެސް ބައެއް ބާވަތްތައް އަވައްޓެރި ގައުމަކަށް ފޮނުވައިގެން ޓެސްޓު ކުރަމުންދާ ކަމަށެވެ. އަދި ކުރިއަށް އޮތްތަނުގައި ރާއްޖޭއަށް އެތެރެކުރާ މޭވާ ތަރުކާރީގެ ބާވަތްތައް ވެސް ޓެސްޓު ކުރާނެ ކަމަށް މިނިސްޓަރު ހަލީލު ވިދާޅުވިއެވެ.
