އިޒްރޭލުން ޣައްޒާ އަށް ދޭ ހަމަލާތައް ވަރުގަދަވެ، ބުރާސްފަތި ދުވަހު ފަތިހުން ފެށިގެން ދިން ހަމަލާތަކުގައި 22 މީހުން ޝަހީދު ކޮށްލި

ޣައްޒާ ހަނގުރާމަ ހުއްޓާލުމުގެ މަޝްވަރާތަކާ ބެހޭ ވާހަކަތައް އިވެމުން ދިޔަ ނަމަވެސް އިޒްރޭލުން ޣައްޒާ އަށް ދޭ ހަމަލާތައް ދަނީ އިތުރަށް ވަރުގަދަ ކުރަމުންނެވެ. ބުރާސްފަތި ދުވަހު ގެ ފަތިހުން ފެށިގެން މެންދުރާ ހަމައަށް އިޒްރޭލުގެ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު މަދުވެގެން 22 ށް އަރާ ކަމަށް ސިއްހީ އޮފިޝަލުން ބުނެއެވެ.

އިޒްރޭލުން ބުރާސްފަތި ދުވަހުގެ ފަތިހު ހަމަލާ ދިނީ ޣައްޒާގެ މެދުތެރޭގެ ދާރުލް ބަލާހް އަށާއި ދެކުނުން ޚާން ޔޫނިސް އަށެވެ.

ބައިބޯ ދާރުލް ބަލާހްގެ ބަޔަކުން ވަޒަންވެރިން ފައިބަން އިޒްރޭލް ސިފައިން އަމުރު ކުރުމުން އެ ތަން ދޫކޮށް ދިއުމަށް ފަލަސްތީން މީހުންނަށް ވަނީ މަޖުބޫރުވެފައެވެ. އިޒްރޭލުގެ އިވެކުއޭޝަން އޯޑަރާ އެކު އިޒްރޭލުގެ ސިފައިން ގެންދަނީ ބަރު ހަތިޔާރާ އެކު ދާރުލް ބަލާޙްގެ އެންމެ އެތެރެއަށް ވަންނަމުން ކަމަށް ރިޕޯޓްތައް ބުނެއެވެ.

ޣައްޒާގެ އުތުރު ސަރަހައްދުގައި ހުންނަ ސަލާހުއްދީން ސްކޫލަށް އިޒްރޭލް ސިފައިންވަނީ ނުރައްކާތެރި ހަމަލާއެއްދީފައެވެ. މި ބިރުވެރި ހަމަލާ ފަލަސްތީންގެ ރެފިއުޖީންނާ ބެހޭ އދ ގެ އޭޖެންސީން ވަނީ ކުށްވެރިކޮށްފައެވެ. މި ހަމަލާގައި ފަލަސްތީންގެ 4 މީހުން ވަނީ ޝަހީދުވެފައެވެ.

ހަމަލާތައް ހުއްޓާލުމަށް އިޒްރޭލަށް ބާރު އެޅުއެޅުއްވުމަށް އެމެރިކާގެ ރައީސް ޖޯ ބައިޑެން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ ފޯނުން މަޝްވަރާ ކުރައްވައިފި ކަމަށް ރިޕޯޓްތައް ބުނެއެވެ.

އިޒްރޭލުން ޣައްޒާ އަށް ދެމުންދާ 10 މަސް ދުވަހަށްވުރެ ގިނަ ދުވަސް ވީ ހަމަލާތަކުގައި މަދުވެގެން 40،223 މީހުން ފަލަސްތީނުން މިހާތަނަށް ޝަހީދުވެފައިވެއެވެ. ހަމަލާތަކުގައި 92،981 މީހުން ވަނީ ޒަޚަމްވެފައެވެ.