ޖަރުމަނު ޤައުމީ ޓީމުން ރިޓަޔާވާން ނޯޔާ ނިންމައިފި

ޖަރުމަނުގެ ޤައުމީ ޓީމަށް ކުޅެމުން އައި ތަޖުރިބާކާރު ގޯލު ކީޕަރު، މެނުއަލް ނޯޔާ ޤައުމީ ޓީމުން ރިޓަޔާވާން ނިންމައިފި އެވެ.

ޤައުމީ ޓީމަށް ކުޅުން ހުއްޓާލަން ނިންމިއިރު، ނޯޔާގެ އުމުރުން 38 އަހަރެވެ. އޭނާ އަށް ޖަރުމަނު ޤައުމީ ޓީމުން އެންމެ ފުރަތަަމަ ޖާގަ ލިބުނީ 2009 ވަނަ އަހަރު އެވެ. އޭގެ ފަހުން އޭނާ ވަނީ 124 މެޗުގައި ޖަރުމަނުގެ ގޯލު ބަލަހައްޓައިފަ އެވެ. ޖަރުމަނާ އެކު ނޯޔާ ވަނީ، 2010 ވަނަ އަހަރުގެ ފީފާ ވޯލްޑް ކަޕްގެ ތިން ވަނަ އަދި 2014 ވަނަ އަހަރުގެ ފީފާ ވޯލްޑް ކަޕްގެ ޗެމްޕިއަންކަން ހޯދައިފަ އެވެ. އެ މުބާރާތުގެ އެންމެ މޮޅު ކީޕަރަކަށް ހޮވުނީ ވެސް ނޯޔާ އެވެ.

ޖަރުމަނު ޤައުމީ ޓީމާ އެކު ނޯޔާ އެންމެ ފަހުން ކުޅުނު މުބާރާތަކީ، މިއަހަރު ޖަރުމަނުގައި އޮތް ޔޫރޯ ފުޓުބޯޅަ މުބާރާތެވެ. އެ މުބާރާތުގައި ވެސް ޖަރުމަނުގެ އެއް ނަންބަރު ގޯލު ކީޕަރަކީ ނޯޔާ އެވެ. އެ މުބާރާތުގެ ކުއާޓާ ފައިނަލްގައި ސްޕެއިންއާ ދެކޮޅަށް ޖަރުމަނު ކުޅުނުއިރު، އެ މެޗަކީ ޤައުމީ ޓީމަށް ނޯޔާ ކުޅުނު އެންމެ ފަހު މެޗެވެ.

ޖަރުމަނުގެ ބަޔާން މިއުނިކަށް ކުޅެމުން އަންނަ ނޯޔާ ޤައުމީ ޓީމުން ރިޓަޔާވަން ނިންމި ނަމަވެސް، ކުލަބު ކެރިއަރު އޭނާ ކުރިއަށް ގެންދާނެ އެވެ.