އަވަސް އަރުވާލައިގެން ޝަމީމް ވަކިކުރަން ބުރާސްފަތި ދުވަހުގެރޭ އިތުރު ޖަލްސާއެއް
22 އޯގަސްޓު 2024 | ބުރާސްފަތި 10:44ދައުރު އިތުރުކޮށްފައިވާއިރު ފަހު ޖަލްސާ އަންނަ ހޯމަ ދުވަހުވެސް ބޭއްވޭނެ
ޕީޖީ ހުސައިން ޝަމީމް ޖުޑިޝަރީ ކޮމިޓީގައި
އަވަސް އަރުވާލައިގެން ޕްރޮސެކިއުޓަރ ޖެނެރަލް ހުސައިން ޝަމީމް ވަކިކުރަން ބުރާސްފަތި ދުވަހުގެރޭ އިތުރު ޖަލްސާއެއް ބާއްވަން ނިންމައިފިއެވެ.
ރައްޔިތުންގެ މަޖިލީހުގެ ބުރާސްފަތި ދުވަހުގެ ހެނދުނު ބޭއްވި މި ދައުރުގެ 32 ވަނަ ޖަލްސާ ނިންމަވާލައްވަމުން މަޖިލީހުގެ ނައިބު ރައީސް ނާޒިމް ވިދާޅުވީ މި ދައުރުގެ ފަހު ޖަލްސާ އޮންނާނީ ބުރާސްފަތި ދުވަހުގެ ރޭ 9:00 ގައި ކަމަށެވެ. ޕީޖީ ޝަމީމް ވަކިކުރަން ނިންމާ އިތުރު ޖަލްސާއެއް ބުރާސްފަތި ދުވަހުގެރޭ ބާއްވަން ނިންމާފައިވީނަމަވެސް އަދިވެސް އެ ޖަލްސާގެ އެޖެންޑާ އަދިވެސް މަޖިލީހުގެ އިދާރާއިން އާންމު ނުކުރެއެވެ.
20 ވަނަ މަޖިލީހުގެ މި ދައުރު ފުރަތަމަ ނިންމަން ހަމަޖެއްސީ މި މަހުގެ 15 ވަނަ ދުވަހުއެވެ. ނަމަވެސް މަޖިލީހުގެ މަސައްކަތްތައް ނުނިމޭތީ ދައުރު ވަނީ މި މަހުގެ 26 ވަނަ ދުވަހާ ހަމައަށް ދިގުދައްމާލާފައެވެ. އެގޮތަން ނިންމީ 13 ވަނަ ދުވަހު ބޭއްވި 27 ވަނަ ޖަލްސާގައެވެ.
ނަމަވެސް ހޯމަ ދުވަހު މަޖިލީހުގެ ޖަލްސާއެއް ބޭއްވެން އޮއްވާ އަވަސް އަރުވާލައިގެން ޕީޖީ ވަކިކުރަން މަޖިލީހުގެ ޖަލްސާއެއް ބޭއްވުމަށް ވަނީ ނިންމާފައެވެ.
ޖުޑިޝަރީ ކޮމިޓީން ޕީޖީ ވަކިކުރަން ފާސްކޮށްފައިވަނީ މަގާމުން ވަކި ކުރުމުގެ މައްސަލައިގައި ޖަވާބުދާރީ ވުމުގެ ޖަލްސާ ހުޅުވާލައިގެން ގެންދަން ޝަމީމްއެދިވަޑައިގެންފައިވަނިކޮށް، އެ ފުރުސަތު ދެއްވުމެއް ނެތިއެވެ. ޝަމީމް ވަކި ކުރަން ފެންނަކަމަށް 8 މެމްބަރަކު ވޯޓު ދެއްވިއިރު، ދެކޮޅަށް ވޯޓު ދެއްވީ 2 މެމްބަރެކެވެ.
