އިޒްރޭލުގެ ވައިގެ ހަމަލާތަކުގައި އެއް ދުވަހުގެ ތެރޭގައި މަދުވެގެން 35 ފަލަސްޠީނު މީހުން ޝަހީދުވެއްޖެ ކަމަށް އަލް ޖަޒީރާ އިން ބުނެފިއެވެ.
އަނެއްކޮޅުން، ހޮސްޕިޓަލްތަކުން ތެޔޮ ހުސްވަމުން ދިއުމާއެކު ފަރުވާ ހޯދަމުންދާ ކުޑަކުދިންގެ ފުރާނަ ގެއްލުމުގެ ނުރައްކާ އޮތް ކަމަށް ސިއްހީ އޮފިޝަލުން ބުނެފައިވާ ކަމަށްވެސް އަލް ޖަޒީރާ އިން ހާމަ ކޮށްފައިވެއެވެ.
ހޯމަ ދުވަހު ޝަހީދުވި މީހުންގެ ތެރޭގައި އިސްރާއީލު ބާރުތަކުން ޣައްޒާ ސިޓީ އަށް ދިން ހަމަލާތަކުގައި ޝަހީދުވި 13 މީހުން ހިމެނެއެވެ.
އަލްޖަޒީރާ އިން ބުނާ ގޮތުގައި މީގެ ތެރެއިން މަދުވެގެން 9 މީހުން ޝަހީދު ވެފައިވަނީ ހުޅަނގު ޣައްޒާ ސިޓީގައި ހުންނަ އދ. އިން ހިންގާ ޝާޠީ ރެފިއުޖީ ކޭމްޕުގައި ތިބި ފަލަސްޠީނުންގެ ބަޔަކަށް އަމާޒުކޮށް ދިން ވައިގެ ހަމަލާއެއްގައެވެ.
ހޯމަ ދުވަހު އުތުރު ޣައްޒާ ސިޓީގެ އަޒް-ޒަރްޤާ ސަރަޙައްދުގައި އާންމު މީހެއްގެ ކާރަކަށް އިސްރާއީލުން ދިން ބޮމުގެ ހަމަލާއެއްގައި އިތުރު 4 މީހުން ޝަހީދުވި ކަމަށް ފަލަސްޠީނުގެ އިންފޮމޭޝަން ސެންޓަރުން ބުނެފައިވެއެވެ.
އަލް ޖަޒީރާ އިން ބުނެފައިވަނީ އިސްރާއީލުގެ ހަނގުރާމަ މަތިންދާބޯޓުތަކުން ދެކުނު ޣައްޒާ ސިޓީގެ ޞަބްރާ ސަރަޙައްދުގެ ގެތަކަށް ވެސް ހަމަލާދެމުންދާ ކަމަށެވެ.
ކަމާލް އަދްވާން ހޮސްޕިޓަލުގެ ޑިރެކްޓަރު ޙުސާމް އަބޫ ސަފިއްޔާ އަލް ޖަޒީރާއަށް މައުލޫމާތު ދެމުން ބުނެފައިވަނީ "ތެލުގެ ދަތިކަމުގެ ސަބަބުން ހޮސްޕިޓަލް ބަންދު ކުރަން ޖެހުމުގެ ބިރު އޮތުމާއެކު، ނާސަރީ އަދި އިންޓެންސިވް ކެއަރ ޔުނިޓުތަކުގައި ތިބި 11 ބަލި ކުދިންގެ ފުރާނަ ގެއްލުމުގެ ނުރައްކާ އެބައޮތް" ކަމަށެވެ.
އަބޫ ސަފިއްޔާ އިންޒާރުދެއްވީ ފަރުވާ އަށް އެނދުމަތި ކޮށްފައިވާ ކުޑަކުދިންގެ ތެރޭގައި ވަރަށް ތުއްތު ކުދިން ހިމެނޭ ކަމަށާއި، އުތުރު ޣައްޒާއަށް ތެޔޮ ނުލިބޭހާ ހިނދަކު އެކުދިންގެ ފުރާނަ ސަލާމަތް ކުރެވޭނެ ކަމަށް ނުބެލޭ ކަމަށެވެ.
އަލްޖަޒީރާގެ ނޫސްވެރިން ބުނާ ގޮތުގައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ވަނީ ބޭހާއި ތެޔޮ ޣައްޒާގެ އުތުރަށް ފޮނުވާފައެވެ.
އެހެންނަމަވެސް މިހާތަނަށް އަދިވެސް އެ ތަކެތި ހުރީ ޗެކްޕޮއިންޓުގައި، އިޒްރޭލު ސިފައިންގެ ފަރާތުން ހުއްދަ ނުލިބޭތީ ތާށިވެފައެވެ. އެހެން ކަމުން އެތަކެތި އަވަހަށް ހޮސްޕިޓަލަށް ފޯރާނެ ކަމުގެ އެއްވެސް ޔަގީން ކަމެއް ނެތް ކަމަށްވެސް ރިޕޯޓްކޮށްފައިވެއެވެ.
ފަލަސްތީނުގެ މިނިސްޓްރީ އޮފް ހެލްތުން ބުނާގޮތުގައި، އޮކްޓޯބަރު 7 އިން ފެށިގެން މަދުވެގެން 33 ސިއްހީ މަރުކަޒު ވަނީ ޚިދުމަތް ދިނުން ހުއްޓާލާފައެވެ. ބާކީ ހުރި ސިއްހީ ޚިދުމަތްދޭ ތަންތަނަށް ޚިދުމަތް ދިނުމަށް ކޮންމެ ދުވަހަކު މަދުވެގެން 4،000 ލީޓަރު ތެޔޮ ބޭނުންވެއެވެ.
އެހެން ނަމަވެސް އިޒްރޭލު ސިފައިން ޣައްޒާ ހިސޯރުކޮށްފައި އޮތުމުގެ ސަބަބުން ހޮސްޕިޓަލްތަކަށް ބޭނުންވާ ތެލާއި ބޭސް ފޯރުކޮށްދިނުމަށް ވަނީ ބޮޑެތި ހުރަސްތަކެއް ކުރިމަތިވެފައި ކަމަށް ސިއްހީ އޮފިޝަލުން ތަކުރާރުކޮށް އަންނަނީ ބުނަމުންނެވެ.
