ސްޕެނިޝް ލަލީގާ ރޭ ބާސެލޯނާއިން ފެށީ އެ ޓީމުގެ ޖަރުމަނު މިޑްފީލްޑަރު އިކާއީ ގުންޑޮގަން ނުލަ އެވެ. އޭނާ އަކީ މިވަގުތު ޓީމުގައި ހުރި އެންމެ ތަޖުރިބާކާރު އެއް ކުޅުންތެރިޔާ އެވެ. ހާއްސަކޮށް އޭނާ ވަރުގެ މިޑްފީލްޑަރަކު ޓީމުގައި ނެތެވެ. ނަމަވެސް ސްޕޭނުގެ ރިޕޯޓްތައް ބުނާ ގޮތުން ގުންޑޮގަން މިހާރު ބޭނުންވަނީ ބާސެލޯނާ ދޫކޮށްލާށެވެ.

މައްސަލަ ފެށެނީ ކުލަބުން ބޭނުންނުވިޔަސް ކުޅުންތެރިޔާ ދާން ބޭނުންވުމުން މި ހިސާބުންނެވެ. މާލީ އަޑިގަނޑެއްގައި އޮތް ކުލަބުން މި ސީޒަނަށް ތައްޔާރުވީ ގުންޑޮގަން އަކީ މުހިންމު ކުޅުންތެރިއަކަށް ހަދައިގެންނެވެ. އޭނާ ވެސް ކުރިން ހުރީ ކުލަބުގައި މަޑުކުރާ ގޮތަށެވެ. އެކަމަކު ހިޔާލު ތަފާތުވީ ކުއްލި ގޮތަކަށެވެ. ފަހަރުގައި މިއީ ބާސެލޯނާގެ އެތެރޭގައި ވަކިވަކި ކުޅުންތެރިންނާމެދު ކުރެވުނު ބަހުސްގައި ގުންޑޮގަންއާމެދު ދެއްކި ވާހަކަތައް ބޭރަށް ފޭދުމުގެ ސަބަބަކަށްވެސް ވެދާނެ އެވެ. ކުލަބުން ހިތްހަމަޖެހޭ އަގެއް ލިބިއްޖެނަމަ ބާސެލޯނާ އޮތީ މަދު ކުޅުންތެރިއަކު ނޫނީ ވިއްކާލަން ތައްޔާރަށެވެ. ސަބަބަކީ މާލީ ހާލަތުން އަރައިގަތުމެވެ.

ބާސެލޯނާއަށް ހިލޭ ޓްރާންސްފާއެއްގައި ގުންޑޮގަން މިދިޔަ އަހަރު ބަދަލުވީ ދެ އަހަރު ދުވަހަށެވެ. އެކަމަކު 33 އަހަރުގެ މިޑްފީލްޑަރު ބޭނުންވާނަމަ އިތުރު އެއް އަހަރު މަޑުކުރެވޭނެ އެވެ. ނަމަވެސް އެއް ސީޒަނަށް ފަހު އޭނާ ބާސެލޯނާ ދޫކޮށްލަން ބޭނުންވީ ކުއްލިއަކަށެވެ. ސްޕޭނުގެ ނޫސްތަކަށް ވެސް މިއީ ކީއްވެކަމެއް ޔަގީނެއްނޫނެވެ. އެކަމަކު ގުންޑޮގަން އަށް ހުށަހެޅުން ލިބިފައިވަނީ ތުރުކީ އާއި ސައޫދީ އަރަބިއާއިންނެވެ. ތަޖުރިބާކާރު ކޯޗު ހޯސޭ މޮރީނިއޯ ދާދި ފަހުން ކޯޗުކޮށްދޭން ފެށި ތުރުކީގެ ފެނަބާޗޭއިން ގުންޑޮގަން ގަންނަން ބޭނުންވެ އެވެ. އެކަމަށް މަގުފަހިކޮށްދޭން ކުޅުންތެރިޔާ ހުރިނަމަ މޮރީނިއޯ ހުރީ ކޮންމެ ގޮތަކަށް މިކަން ކުރަން ތައްޔާރަށެވެ.

ގުންޑޮގަން ނުލައި ބާސެލޯނާއިން ރޭ ވެލެންސިއާއާ ދެކޮޅަށް ކުޅެން ނުކުރީ ތަޖުރިބާމަދު ޒުވާން ދެ މިޑްފީލްޑަރުން ގޮވައިގެންނެވެ. އޭނާ ކުޅެން ބޭނުންނުވީ ކަމަށްވެ އެވެ. ނަމަވެސް ކޯޗު ޖަރުމަނުގެ ހަންސީ ފްލިކް އޭނާގެ ކޯޗުކަމުގައި ކުޅުނު ފުރަތަމަ މެޗުގެ ވަގުތުކޮޅެއް ކުރީ ބުނީ ގުންޑޮގަން މެޗުގައި ނުކުޅެނީ މުޅިން ފިޓްނުވާތީ ކަމަށެވެ. އެކަމަކު އޭނާ އަށް ލިބުނު އަނިޔާއަކީ ކޮބާކަމެއް ވެސް ކުލަބުން ވެސް ކުޅުންތެރިޔާ ވެސް ނުބުނެ އެވެ. ސްޕޭނުގެ ސްޕޮޓް ނޫހުން ބުނަނީ ގުންޑޮގަން ނުކުޅުނީ މެޗުގައި ކުޅެފިނަމަ އޭނާއަށް ބާސެލޯނާ ދޫކޮށްލަން ހުރަސް އެޅިދާނެތީ ކަމަށެވެ.

ގުންޑޮގަން އަކީ ތުރުކީ ދަރިކޮޅުގެ މީހެކެވެ. 2018 ވަނަ އަހަރު ތުރުކީގެ ރައީސް ރަޖަބް ތައްޔިބް އޮރްދްގާންއާ ބައްދަލުކުރުމަށްފަހު މިއީ އަހަރެންގެ ރައީސް ކަމަށް ބުނުމުން ގުންޑޮގަން އަށް ޖަރުމަނުގެ ގައުމީ ޓީމުން ވެސް ޖާގަ ގެއްލުނެވެ. އެއަށްފަހު އޭނާ އަށް އަލުން ޓީމު ޖާގަ ލިބުނީ އަހަރުތަކެއް ފަހުންނެވެ. އަނެއްކޮޅުން ބާސެލޯނާއަށް މިދިޔަ ސީޒަން ފެށުމުގެ ކުރިން ބަދަލުވެ ލިބުނު މެހުމާންދާރީއާއެމު ގުންޑޮގަން އަށްވުރެ ބޮޑަށް ހިތްހަމަނުޖެހިފައިހުރީ އޭނާގެ އަންހެނުންނެވެ. އިނގިޜޭސި ޗެމްޕިއަން މެންޗެސްޓާ ސިޓީގައި އަށް އަހަރު ހޭދަކޮށް އުފާވެރި ދިރިއުޅުމެއް އުޅުނު ނަމަވެސް ބާސެލޯނާ އަށް ބަދަލުވެ، އުޅޭނެ ގެއެއް ހޯދުމާއި ތަކެތި ބަދަލުކުރުމުގައި ކުލަބުގެ އެހީތެރިކަން ކުޑަކަމުން ގުންޑޮގަން މައްސަލަ ވެސް ޖެއްސި އެވެ. ބާސެލޯނާއިން މިކަން ފަހުން ރަނގަޅު ކުރީ ސީދާ ކުލަބުގެ ރައީސް ހުއާން ލަޕޯޓާގެ އެންގެވުމަށެވެ.

މިހާރު ދިމާވެފައިވާ މައްސަލައަކީ ފަހަރުގައި ބާސެލޯނާގައި މާލީ ދަތިތަކުގެ ސަބަބުން ތަށި ހޯދޭ ވަރުގެ ވަރުގަދަ ސްކޮޑެއް ނެތުން ކަމަށް ވެސް ވެދާނެ އެވެ. ނޫނީ ތުރުކީން ނުވަތަ ސައޫދީގެ ހުށަހެޅުމަށް އިޖާބަދީފިނަމަ ކެރިއަރުގެ ފަހުކޮޅު މާ ރަނގަޅު މާލީ ފައިދާއެއް ލިބުން ކަމަށްވެސް ވެދާނެ އެވެ. ކޮންމެއަކަސް ގުންޑޮގަން އަދި ހުރީ ބާސެލޯނާގެ ޖާޒީގައި އިތުރު މެޗެއް ކުޅޭ ގޮތަކަށްނޫނެވެ.