ރާއްޖެ އަށް ކުރި ވިއްސާރައިން ލިބުނު ގެއްލުން މެނޭޖްކުރުމުގައި ފެނުނީ ވެރިންގެ ދޯދިޔާކަންކަމަށް މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ މާލެ އަށް ބޯކޮށް ވާރޭ ވެހުމުން ލިބުނު ގެއްލުންތައް މެނޭޖްކުރުމުގައި ސަރުކާރުގެ އެންމެ މަތީ ފެންވަރުގައި ވެސް ރޭވުންތެރިކަމެއް ނެތްކަން ފެނިގެން ދިޔަ ކަމަށެވެ. އަދި ރައީސުލްޖުމްހޫރިއްޔާ އަށް ސަރުކާރުގެ އިސްމަޤާމުތަކުގައި ތިބި ބޭފުޅުންގެ އިތުބާރު ވެސް ނެތްކަަމަށް އެ ބޭފުޅުންގެ ޢަމަލުތަކުން ހީވާ ކަމަށް އޭނާ ވިދާޅުވިއެވެ. އެހެން ނޫންނަމަ އިސް ނަގައިގެން މަގުތަކަށް ނުކުމެ އާއްމުންނަށް ދިމާވި ކަންކަން ހައްލުކުރަން ވެރިން މަސައްކަތް ނުކުރަންވީ ކީއްވެގެންތޯ އިކްރާމް ސުވާލު އުފެއްދެވިއެވެ. ސަރުކާރުގެ ފަރާތުން ފެނުނީ މި ހާލަތުގައި ވެސް ދެއްކުންތެރިކަމުގެ މަންޒަރުތައް ކަމަށް އޭނާ ވަނީ ވިދާޅުވެފައެވެ. ސަރުކާރުން ބެލީ މަގުމަތީގައި ފެން ބޮޑުވެފައި އޮއްވާ، އެ ފެންގަނޑު ހިންދުމުގެ ބަދަލުގައި މަގުތަކަށް ނުކުމެ ފޮޓޯތައް ނަގައިގެން މީސްމީޑިއާގައި ސަމާލުކަން ހޯދޭތޯ ކަމަށް ވެސް އިކްރާމް ވިދާޅުވިއެވެ.
ފެންގަނޑު ކަކޫތާފެނަށް ބޮޑުވެފައި އޮތް އެތައް އިރަކު. އެކަމަކު ކަންކަން ކުރެވެމުންދާގޮތުން ދޯދިޔާ ކަލްޗަރ އެއް އޮތީ. އެއްވެސް ކަމެއް ސީރިއަސްކޮށް ނުނަގާ. މާލެ ތެރޭގަ ރައްޔިތުންނަށް ދިރިއުޅެވޭ ވަރުކޮށްލެވުނީ ވަރަށް ލަހުން. މެމްބަރުން ހުދު ގަމީހުގަ މަގުމައްޗަށް ނުކުމެ ފޮޓޯ ނަގަން އުޅުނު މަންޒަރު ފެނިގެން ދިޔައީ. ފޮޓޯ ނަގާފައި ޓްވީޓްކޮށް، ބައެއް ވީޑިއޯ ޕޯސްޓް ކުރީ. މިއީ ދެއްކުންތެރިކަން. ކޮންމެ ސަރުކާރެއް އޮތަސް ކަންކަން މެނޭޖްކުރައްވަންވާނީ ތަންކޮޅެއް ރަނގަޅަށް.މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން
ވިއްސާރަ އާއި ގުޅިގެން ޓާސްކްފޯސް އެކުލަވާލީ ވެސް ކަމާއި ގުޅުން ހުރި އިދާރާތައް ނެތި ކަމަށާއި އެއީ ދެރަވަރުކަމެއް ކަަމަށް އިކްރާމް ވިދާޅުވިއެެވެ. އަދި އެ ޓާސްކްފޯސް ވެސް އުފެއްދީ ޒިންމާދާރުކަމެއް ނެތި ކަމަށް އޭނާ ވިދާޅުވިއެވެ. ޓާސްކް ފޯސް އުފައްދައިގެން ހަރުދަނާ މަސައްކަތްތަކެއް ނުކުރެވުނު ކަމަށް އިކްރާމް ވަނީ ވިދާޅުވެފައެވެ.
އަންގާރަ ދުވަހު ކުރި ވިއްސާރާގައި މާލެ ގެތަކަށް ލިބުނު ގެއްލުމުގެ ޑެމޭޖް އެސެސްމަންޓް ހެދުމުގެ މަސައްކަތް އެންޑީއެމްއޭ އިން ދަނީ ކުރަމުންނެވެ. މާލޭގެ ހާލަތު ދެނެގަތުމަށް 11 ޓީމުން މަސައްކަތް ކުރަމުންދާ ކަަމަށާއި ބޮޑަށް ގެއްލުން ލިބުނު ގޭގެއަށް އެ ޓީމްތަކުން ޒިޔާރަތްކުރަމުންދާ ކަމަށް އެންޑީއެމްއޭ އިން ވަނީ ބުނެފަ އެވެ. ނަމަވެސް މިކަމާއި ގުޅޭ އިތުރު ތަފްސީލްތައް އަދި އެންޑީއެމްއޭ އިން ހާމައެއް ނުކުރައްވައެވެ. މި މަސައްކަތުގައި ރާއްޖޭގެ ރެޑްްކްރެސެންޓުން ދަނީ އެހީތެރިވަމުންނެވެ.
މުޅިރާއްޖޭގެ މޫސުން ގޯސްވެފައިވާތީ ހުރިހައި ފަރާތްތަކުން މޫސުމަށް ވަނީ އިލްތިމާސްކޮށްފައެވެ. އަދި ކަނޑު ދަތުރުކުރާ ފަރާތްތަކުން އެންމެ ފަހުގެ މޫސުމާއި ބެހޭ ތަފްސީލްތައް ބެލުމަށް ފަހު ނޫނީ ދަތުރު ނުކުރުމަށް ކަމާއި ބެހޭ ފަރާތްތަކުން އިލްތިމާސްކުރެއެވެ.
