ފަލަސްތީން މީހުންގެ ގޯތި ގެދޮރުގައި ހައްދުފަހަނަ އެޅި ޔަހޫދީން ހުޅު ޖަހަނީ

ގަވައިދާ ޚިލާފަށް ފަލަސްތީންގެ ބިންތަކުގައި ގަދަކަމުން ވަޒަންވެރިގެން އުޅޭ ހައްދުފަހަނަ އެޅި ޔަހޫދީން ފަލަސްތީން މީހުންގެ ގޯތިގެދޮރާއި މުދަލުގައި ހުޅުޖަހަމުން އެބަދެއެވެ.

ބުރާސްފަތި ދުވަހު ފަލަސްތީންގެ އަވަށެއްގައި ހުޅުޖަހާފައިވާ މަންޒަރު ސޯޝަލް މީޑިއާގައި ވަނީ އާންމުވެފައެވެ.

އޭގެ އިތުރުން ހަތިޔާރު ހިފައިގެން އުޅޭ ހައްދުފަހަނަ އެޅި ޔަހޫދީން ފަލަސްތީން މީހުންގެ ގަޔަށް ބަޑިޖަހާ މެރުންވެސް ވަނީ އާންމު ވެފައެވެ.

ބުރާސްފަތި ދުވަހު ފަލަސްތީންގެ ރެޑްކްރެސެންޓުން ހާމަ ކޮށްފައިވާ ގޮތުގައި ހިފައިފައިވާ ހުޅަނގު އައްސޭރީގެ ގަލްގިލްޔާ ސިޓީ އާ ދުރުނޫން ހިސާބެއްގައި ޔަހޫދީ ބަޔަކު ބަޑިޖެހުމުގެ ސަބަބުން ފަލަސްތީނުގެ ޒުވާނަކު މަރުވެ އިތުރު ޒުވާނަކަށް ސީރިއަސް ޒަޚަމްތަކެއް ވަނީ ލިބިފައެވެ.

ހަތިޔާރު ހިފައިގެން އުޅޭ ޔަހޫދީންނަށް އިޒްރޭލް ސިފައިންގެ ފުރިހަމަ ރައްކައުތެރިކަމާ ހިމާޔަތް ދޭ ކަމަށް ރިޕޯޓްތައް ބުނެއެވެ.

ބުރާސްފަތި ދުވަހުގެ މި ހާދިސާގައި ހަތިޔާރު ހިފައިގެން ތިބި ސަތޭކަ އެއްހާ ޔަހޫދީން ހަރަކާތްތެރިވި ކަމަށް މަންޒަރު ދުށް މީހުން ބުނެފައިވެއެވެ.

މި މީހުން ފަލަސްތީން މީހުންގެ ގަޔަށް ބަޑި ޖެހުމުގެ އިތުރުން ހަތަރު ގެއެއް ރޯކޮށްލާ، ހަ ކާރުގައި ވަނީ ހުޅު ޖަހާފައެވެ.

މި ޖަރީމާ ކުށްވެރިކޮށް ހަމާސް އިން ވަނީ ބަޔާނެއް ނެރެފައެވެ. މި ބަޔާނުގައި މިފަދަ ޖަރީމާތައް ހިންގައިގެން ފަލަސްތީން ރައްޔިތުން މިނިވަންކަން ހޯދަން ކުރާ ހިތްވަރު ބަލި ނުކުރެވޭނެ ކަމަށް ބުނެފައިވެއެވެ.

އޮކްޓޯބަރު 7 ގެ ފަހުން ހުޅަނގު އައްސޭރިއަށް ޔަހޫދީ ސިފައިން ދޭތެރެ ދޭތެރެއިން އަރާ ފަލަސްތީން ރައްޔިތުންނަށް އަނިޔާދީ ދުއްތުރާ ކުރުން ވަނީ އިތުރުވެފައެވެ. އިޒްރޭލުން ހުޅަނގު އައްސޭރީގައި ހިންގާފައިވާ އުދުވާން ތަކުގައި 624 ފަލަސްތީން މީހުން ޝަހީދުވެފައިވެއެވެ.

އިޒްރޭލުގެ އަނިޔާވެރި ސިފައިންގެ ހަމަލާތަކުގައި ގާޒާ އިން ޝަހީދުވި މީހުންގެ އަދަދު 40،000ށް ވުރެ މައްޗަށް ގޮސްފައިވާ ކަމަށް ބުރާސްފަތި ދުވަހު ގާޒާގެ ހެލްތް މިނިސްޓްރީން ވަނީ ހާމަ ކޮށްފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.