މޯލްޑިވްސް ކަރެކްޝަނަލް ސަރވިސްއިން ހޯދަމުންދާ ކާމިޔާބީތަކަކީ ޤައުމީ ފެންވަރުގައި ފާހަގަ ކޮށްލެވޭ ކާމިޔާބީތަކެއްކަމަށް ކޮމިޝަނަރ އޮފް ޕްރިޒަންސް ހަސަން ޒަރީރު ވިދާޅުވެއްޖެއެވެ.
އޭނާ އެހެން ވިދާޅުވީ، މޯލްޑިވްސް ކަރެކްޝަނަލް ސަރވިސަސްއަށް 53 އަހަރު ފުރުމުގެ މުނާސަބަތުގައި ވާހަކަ ދައްކަވަމުންނެވެ.
ސީޕީ ވަނީ ދުވަހުގެ ތަހުނިޔާ ކަރެކްޝަންގެ މުވައްޒަފުންނަށް ފޮނުއްވަވާފައެވެ. އަދި ކަރެކްޝަންސްއިން ހޯދަމުންދާ ކާމިޔާބީތަކަކީ ޤައުމީ ފެންވަރުގައި ފާހަގަ ކޮށްލެވޭ ކާމިޔާބީތަކެއްކަމަށް ސީޕީ ވިދާޅުވިއެވެ.
ސީޕީ ވިދާޅުވީ، ކަރެކްޝަނަލް ސަރވިސްއަކީ ނުހަނު ޒަމާންވީ މުއައްސަސާއެއް ކަމަށާއި، މުއައްސަސާގެ ކަންކަން ތަރުތީބުވެގެން ހިންގަމުން އަންނަތާ 53 އަހަރު ފުރިފައިވާ ކަމަށެވެ.
އޭގެ އިތުރުން، ކަރެކްޝަންސްގެ މުވައްޒަފުން ކުރަމުންދަނީ ނުހަނު މުހިއްމު ޤައުމީ މަސައްކަތެއްކަމަށްވެސް ސީޕީ ވިދާޅުވިއެވެ. ނަމަވެސް މި މަސައްކަތްތަކުގައި އެކި ކަހަލަ ގޮންޖެހުންތައް ހުރިކަމަށް ސީޕީ ވިދާޅުވިއެވެ.
އޭގެ ތެރެއިން އެއް ކަމަކީ ޖަލުތައް ޑިޒައިން ކުރެވިފައިވާ ގޮތްކަން ސީޕީ ފާހަގަ ކުރެއްވިއެވެ. އެގޮތުން އެކި ގޮންޖެހުންތަކާއެކުވެސް މުއައްސަސާ ކުރިއެރުވުމަށް އަމާޒު ހިއްޕަވައިގެން މަސައްކަތް ކުރައްވަމުންދާކަމަށް އޭނާ ވިދާޅުވިއެވެ.
