ދިވެހިންގެ ރާއްޖޭގައި މަސައްކަތްތެރިންނަށް ރަނގަޅު ފުރުސަތުތަކެއް ފަހިކޮށްދީފައިނުވޭ: މެންބަރު ޒިޔާދު
15 އޯގަސްޓު 2024 | ބުރާސްފަތި 09:54ހދ. އަތޮޅުގައި ރިސޯޓެއް ނެތް، އެއީ ކަންބޮޑުވުމެއް
ވައިކަރަދޫ ދާއިރާގެ މެންބަރު ހުސައިން ޒިޔާދު
ދިވެހިންގެ ރާއްޖޭގައި މަސައްކަތްތެރިންނަށް ރަނގަޅު ފުރުސަތުތަކެއް ފަހިކޮށްދީފައިނުވާ ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.
ބުރާސްފަތި ދުވަހު ރައްޔިތުން މަޖިލީހުގެ ޖަލްސާގައި ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރަމުންވަމުން މެންބަރު ޒިޔާދު ވިދާޅުވީ ރާއްޖެ ފަތުރުވެރިކަމުގެ ސިނާއަތުގައި ކުރިއަރައިގެންދާއިރު، ރާއްޖޭގެ ބައެއް އަތޮޅުތަކުގައި ރިސޯޓުތައް ނެތް ކަމަށެވެ. އެގޮތުން ހދ. އަތޮޅުގައި ރިސޯޓެއް ނެތް ކަމަށާއި، އެއީ ކަންބޮޑުވުމެއް ކަމަށް މެންބަރު ޒިޔާރު ވިދާޅުވިއެވެ.
މެންބަރު ޒިޔާދު ވިދާޅުވީ ޓޫރިޒަމާބެހޭ ގާނޫނަށް އިސްލާހެއް ހުށަހެޅިގެންދާއިރު، ފަތުރުވެރިކަން ތަރައްގީ ނުކުރެވި ހުރި ރަށްތަކާއި، ފަތުރުވެރިކަން އެއްވެސް ގޮތަކަށް ނުގޮސް ހުރި ސަރަހައްދުތައް ކުރިއެރުވުމަށް އިސްކަންދޭނެ ކަމަށް އުންމީދުކުރި ކަމަށެވެ. ނަމަވެސް މިފަހަރު ހުށަހެޅި އިސްލާހުގައި މިފަދަ އެއްވެސް ކަމެއް ފާހަގަކޮށްފައިނުވާތީ އެއީ ކަންބޮޑުވުމެއް ކަމަށާއި، ކުރިއަށް އޮތްތަނުގައި މިފަދަ ކަންކަމަށް ބަލާނެ ކަމަށް އުންމީދުކުރާ ކަމަށް މެންބަރު ޒިޔާދު ވިދާޅުވިއެވެ.
ދިވެހިންގެ ރާއްޖޭގައި މަސައްކަތްތެރިންނަށް ރަނގަޅު ފުރުސަތުތައް ނުދޭކަން ފާހަގަކުރައްވައި މެންބަރު ޒިޔާދު ވިދާޅުވީ ރަނގަޅުކުރަން ޖެހޭ ކަންކަން ވަރަށް ގިނަ ކަމަށެވެ. އަދި މަސައްކަތްތެރިންގެ ކަންކަން ރަނގަޅު ކުރުމަށް ވެސް ފުރުސަތު ނުލިބުމަކީ ކަންބޮޑުވުމެއް ކަމަށް މެންބަރު ޒިޔާދު ވިދާޅުވިއެވެ.
މީގެ އިތުރުން މެންބަރު ޒިޔާދު ވިދާޅުވީ ޑޮލަރު ރޭޓު މަތިވަމުންދާ ކަމަށާއި، އޭގައި ހިފެހެއްޓުމެއް ނެތް ކަމަށެވެ. މިއީ ދިވެހިންގެ މުސްތަގުބަލާ ގުޅިފައިވާ ބޮޑު މައްސަލައެއް ކަމަށާއި، ސަރުކާރު މިމައްސަލަ ހައްލު ކޮށްދީފިނަމަ ދިވެހިންގެ މުސްތަގުބަލު ރަނގަޅުވާނެ ކަމަށް އޭނާ ވިދާޅުވިއެވެ.
މެންބަރު ޒިޔާދު މިމޭރުމުން ވާހަކަދެއްކެވިއިރު، ރާއްޖޭގެ ކަޅު ބާޒާރުގައި ޑޮލަރު ވިއްކާ އަގު ދިވެހި ރުފިޔާއިން 18.30 އަށް ވަނީ އުފިލިފައެވެ. ޑޮލަރު ވިއްކާ އަގުތައް 18 ރުފިޔާއަށް ވުރެ މައްޗަށް އުފުލިފައިވާތާ ވަނީ ގިނަ ދުވަސްތަކެއް ވަނީ ވެފައެވެ.
