ރެއާލްގެ އެންމެ ކާމިޔާބު ކުޅުންތެރިޔަކަށް މޮޑްރިޗް!

ސްޕެއިންގެ ރެއާލް މެޑްރިޑުގެ ތާރީޚުގައި ވެސް އެންމެ ކާމިޔާބު ކުޅުންތެރިޔަކަށް، ކްރޮއޭޝިއާގެ މިޑްފީލްޑަރު ލޫކާ މޮޑްރިޗް ވެއްޖެ އެވެ.

އުމުރުން 38 އަހަރުގެ ކުޅުންތެރިޔާ އަކީ ރެއާލްގެ ތާރީޚުގައި ވެސް އެ ކުލަބާ އެކު އެންމެ ގިނަ ތަށި ކާމިޔާބު ކުރި ކުޅުންތެރިޔާ އެވެ. އެ ޝަރަފު އޭނާ އަށް ލިބުނީ، ޔުއެފާ ސުޕަ ކަޕް ރެއާލުން ކާމިޔާބު ކުރުމާ އެކު އެވެ. އެޓަލަންޓާ ބަލިކޮށް ރެއާލުން ސުޕަ ކަޕް ކާމިޔާބު ކުރި މެޗުގައި މޮޑްރިޗް ވަނީ ބަދަލު ކުޅުންތެރިޔެއްގެ ގޮތުގައި ކުޅެފަ އެވެ.

ޔުއެފާ ސުޕަ ކަޕްގެ ތައްޓާއެކު، ރެއާލްގައި މޮޑްރިޗް ކާމިޔާބު ކޮށްފައިވާ ތަށީގެ އަދަދު ވަނީ 27 އަށް އަރައިފަ އެވެ. ރެއާލާ އެކު އޭނާ ވަނީ ސްޕެނިޝް ލީގު ހަތަރު ފަހަރު، ކޮޕާ ޑެލް ރޭ ދެ ފަހަރު، ސްޕެނިޝް ސުޕަ ކަަޕް ފަސް ފަހަރު، ޔުއެފާ ޗެމްޕިއަންސް ލީގު ހަ ފަހަރު، ޔުއެފާ ސުޕަ ކަޕް ފަސް ފަހަރު އަދި ފީފާ ކުލަބު ވޯލްޑް ކަޕް ފަސް ފަހަރު ކާމިޔާބު ކޮށްފަ އެވެ. އޭނާ ވަނީ މިހާތަނަށް ރެއާލަށް ކުޅެދީފައިވާ 535 މެޗުގައި 39 ލަނޑު ޖަހައިފަ އެވެ.

މޮޑްރިޗް ވަނީ ރެއާލްގައި ހުރެ، ދުނިޔޭގެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު 2018 ވަނަ އަހަރު ކާމިޔާބު ކޮށްފަ އެވެ. އޭނާ އަކީ އާޖެންޓީނާގެ ކެޕްޓަން ލިއޮނަލް މެސީ އާއި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފަހަތަށް ޖައްސާލުމަށްފަހު، ބެލެންޑިއޯ އެވޯޑު ހޯދި ފުރަތަމަ ކުޅުންތެރިޔާ އެވެ.

މޮޑްރިޗްގެ ފަހަތުން ރެއާލާ އެކު އެންމެ ގިނަ ތަށި ކާމިޔާބު ކޮށްފައިވާ ކުޅުންތެރިންގެ ލިސްޓުގެ ދެ ވަނައިގައި އޮތީ ޑެނީ ކަވަހާލް އެވެ. ތިން ވަނައިގައި ނާޗޯ ފެނާންޑޭސް އޮތްއިރު، ހަތަރު ވަނައިގައި އޮތީ ކަރީމް ބެންޒެމާ އެވެ. ފަސް ވަނައިގައި އޮތީ މާސެލޯ އެވެ.