ރަޝިއާގެ ކަރސްކް ސަރަހައްދުގައި ދިރިއުޅޭ ދިވެހިން ސަމާލުވުމަށް އިލްތިމާސްކޮށްފި
ދިވެހި ރައްޔިތުން އަމިއްލަ ރައްކާތެރިކަމާއި ސަލާމަތްތެރިކަމަށް ޚާއްސަ އަހައްމިއްޔަތު ކަމެއް ދިނުމަށް އެދިފައިވޭ
ފޮރިން މިނިސްޓްރީ - ކަރސްކް ސަރަހައްދުގައި ތިބި ދިވެހި ކިޔަވާ ކުދިންގެ ހާލު ވަރަށް ގާތުން ދަނީ ބަލަމުން
ރަޝިއާގެ ކަރސްކް ސަރަހައްދަށް ދަތުރުކުރާ އަދި އެ ސަރަހައްދުގައި ދިރިއުޅޭ ދިވެހިން ސަމާލުވުމަށް ފޮރިން މިނިސްޓްރީން އިލްތިމާސްކޮށްފިއެވެ.
ބުދަ ދުވަހު ފޮރިން މިނިސްޓްރީން ބުނީ މިހާރު ހިނގަމުންދާ ޔޫކްރެއިން-ރަޝިއާ ހަނގުރާމައާ ގުޅިގެން، ރަޝިއާގެ ކަރސްކް ސަރަހައްދު އޮތީ ނުރައްކާގެ ހާލަތުގައި ކަމަށެވެ. އެހެންކަމުން ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީއިން ކަރސްކް ސަރަހައްދުގައި ތިބި ދިވެހި ކިޔަވާ ކުދިންގެ ހާލު ވަރަށް ގާތުން ބަލަމުންދާ ކަމަށް މިނިސްޓްރީން ބުނެއެވެ.
ފޮރިން މިނިސްޓްރީން ބުނީ މިދަނޑިވަޅުގައި އެ ސަރަހައްދުގައި ދިރިއުޅޭ އަދި ދަތުރުފަތުރުކުރާ އެންމެހައި ދިވެހިން އަމިއްލަ ރައްކާތެރިކަމާއި ސަލާމަތްތެރިކަމަށް ޚާއްސަ އަހައްމިއްޔަތު ކަމެއް ދިނުމަށް އިލްތިމާސްކުރާ ކަމަށެވެ.
މީގެ އިތުރުން މިނިސްޓްރީން ބުނީ ރަޝިއާގެ ކަރސްކްގައި އޮތް ނުރައްކާގެ ހާލަތާ ގުޅިގެން އެއްވެސް އެހީތެރިކަމެއް ބޭނުންވާނަމަ، ޖަރުމަނުވިލާތުގައި ހުންނަ ދިވެހިރާއްޖޭގެ އެމްބަސީއާ ގުޅުމަށް އެދޭ ކަމަށެވެ.
ޔޫކްރެއިން-ރަޝިއާ ހަނގުރާމައާ ގުޅިގެން މަސްރަހު ގޯސްވެފައިވާއިރު، ޔޫކްރޭނުން ދަނީ ރަޝިއާގެ ގިނަ ސިޓީތަކަށް އެއްގަމުމަގުން އަރައި ހަމަލާތައް ދެމުންނެވެ.
