މަޒްރައޮއީ އާއި ޑި ލިޓް ޔުނައިޓެޑަށް ސޮއި ކޮށްފި

ޖަރުމަނުގެ ބަޔާން މިއުނިކަށް ކުޅެމުން އައި މޮރޮކޯގެ ޑިފެންޑަރު ނުސައިރު މަޒްރައޮއީ އާއި ނެދަލެންޑްސްގެ ޑިފެންޑަރު މަތައިސް ޑި ލިޓް މެންޗެސްޓަރ ޔުނައިޓެޑަށް ސޮއި ކޮށްފި އެވެ.

މި ދެ ކުޅުންތެރިންނަކީ ކުރިއަށް އޮތް ސީޒަނަށް ޔުނައިޓެޑުގެ ޑިފެންސް ވަރުގަދަ ކުރުމަށް ކުރަމުން އަންނަ މަސައްކަތުގެ ތެރެއިން ހޯދި ދެ ކުޅުންތެރިންނެވެ. އަދި މި ދެ ކުޅުންތެރިން ޔުނައިޓެޑަށް ގެނައުމަށް އެންމެ ބޮޑަށް ބާރު އެޅީ ޔުނައިޓެޑުގެ ކޯޗު އެރިކް ޓެން ހާގް އެވެ.

އުމުރުން 26 އަހަރުގެ މަޒްރައޮއި ޔުނައިޓެޑާ އެކު ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. މަޒްރައޮއިގެ ސޮއި ހޯދުމަށް ޔުނައިޓެޑުން ވަނީ ގާތް ގަނޑަކަށް 20 މިލިއަން ޔޫރޯ ޚަރަދުކޮށްފަ އެވެ. ޔުނައިޓެޑާ އެކު މަޒްރައޮއި ސޮއި ކުރި އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ.

އުމުރުން 25 އަހަރުގެ ޑި ލިޓް ޔުނައިޓެޑާ އެކު ސޮއި ކޮށްފައި ވަނީ ފަސް އަހަރު ދުވަހުގެ އެއްބަސްވުމެއްގަ އެވެ. ޑި ލިޓް ހޯދުމަށް ޔުނައިޓެޑުން ވަނީ ގާތް ގަނޑަަކަށް 50 މިލިއަން ޔޫރޯ ޚަރަދު ކޮށްފަ އެވެ. އެ ކުލަބާ އެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ.

ޔުނައިޓެޑުން މި ދެ ކުޅުންތެރިންގެ ސޮއި ހޯދާފައިވާއިރު، މި ދެ ކުޅުންތެރިންނަކީ މީގެ ކުރިން ޓެން ހާގްގެ އިރުޝާދުގެ ދަށުން އަޔެކްސްގައި ވެސް ކުޅެފައިވާ ދެ ކުޅުންތެރިންނެވެ.