ލާމަރުކަޒީ ނިޒާމަށް ގެންނަ ބަދަލުތަކުގެ އެންމެ ބޮޑު އަސަރެއް ކުރާނީ ޒުވާނުންނަށް ކަމަށާއި އެކަންކަން ކުރުމުގައި ޒުވާނުންގެ ރޯލެއް އޮތުން މުހިންމު ކަމަށް ޒުވާނުން ބާރުވެރިކުރުމާއި މަޢުލޫމާތާއި ފަންނާބެހޭ ވަޒީރު އިބްރާޙިމް ވަޙީދު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ "ޕްރެޒިޑެންޝަލް ޔޫތު އެޑްވައިޒަރސް" ބޯޑު އިފްތިތާހުކުރުމަށް ހޯމަ ދުވަހު ބޭއްވި ރަސްމިއްޔާތުގައި ވާހަކަަދައްކަވަމުންނެވެ. ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު "ދިވެހި ޒުވާނުންގެ ޤައުމީ ލަފާދޭ ކޮމިޓީ" އިފްތިތާހުކޮށްދެއްވީ ހޯމަ ދުވަހުއެވެ. މި ކޮމިޓީ އިފުތިތާހުކޮށްދެއްވީ މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ކުރިއަށްދިޔަ ރަސްމިއްޔާތެއްގައެވެ.

ގައުމުގެ ކަންކަމުގައި ޒުވާނުންގެ ބަސް ހިމެނުމަކީ ރަނގަޅު މުސްތަޤްބަލެއް ޤާއިމްކުރުމަށް މުހިންމު ކަމެއް ކަމަށް ފާހަަކުރައްވާ ވަޒީރު ވިދާޅުވީ ނިޒާމީ ގޮތުން އަންނަ ބަދަލުތަކުގައި ވެސް ޒުވާނުން ދެކޭ ގޮތް ބެލުން މުހިންމު ކަމަށެވެ. ހަމައެފަދައިން އެހެން ދާއިރާތަކުގައި ވެސް މުސްތަޤްބަލް ރަނގަޅުކުރުމަށް ޒުވާނުންގެ އުންމީދާއި އެއްގޮތަށް ކަންކަން ކުރެވޭނީ ޒުވާނުންގެ ބަސް ރަނގަޅަށް އިއްވައިގެން ކަަމަށް އެ މަނިކުފާނު ވިދާޅުވިއެވެ. ޒުވާން އުމުރަކީ ތަޖުރިބާކުރުމާއި ކަންކަން ހޯދުމުގެ އުމުރުކަމަށް މިނިސްޓަރ ވަނީ ވިދާޅުވެފައެެވެ. އެއީ ހޯދުންތަކާއި ހަލުވިކަމުގެ އުމުރު ކަމަށް އެ މަނިކުފާނު ވިދާޅުވިއެވެ. ރައީސް އަށް ލަފާދޭ ޒުވާނުން އެކުލެވޭ ބޯޑެއް އެކުލަވާލީ އަލަށް ކަމަށާއި އެއީ މުހިންމު ކަމެއްކަމަށް ވަޒީރު ވިދާޅުވިއެވެ. ޒުވާނުންނަށް ބަސް ނުބުނެވޭނެ، ލަފާ ނުދެވޭނެ ކަމެއް ނެތް ކަމަށް ވެސް ވަޒީރު ވަނީ ވިދާޅުވެފައެވެ. ޒުވާނުންނާއި ނުގުޅޭ ދާއިރާ އެއް ނެތް ކަމަށާއި ޒުވާނުންނަކީ ހުރިހާ ދާއިރާތަކަކާއި ގުޅިލާމެހިފައިވާ ބައެއް ކަަމަށް މިނިސްޓަރ ވަނީ ވިދާޅުވެފައެވެ.

"ޕްރެޒިޑެންޝަލް ޔޫތު އެޑްވައިޒަރސް" ބޯޑު އެކުލަވާލަލައްވާފައިވަނީ 18 ޖަނަވަރީ 2024 ގަ ކަމަށް ވާއިރު މި ބޯޑުގައި ތިއްބަވާނީ 15 މެންބަރުންނެވެ. މި ބޯޑަކީ ރައިސުލްޖުމްހޫރިއްޔާއަށް ލަފާދިނުމަށް އެކުލަވާލާ ބޯޑަކަށްވުމާއި އެކު މި ބޯޑުގެ ސެކްރެޓޭރިއޭޓް ބަލަހައްޓާނީ ޔޫތު މިނިސްޓްރީއިންނެވެ. މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ދިވެހި ޒުވާނުންގެ ޤައުމީ ލަފާދޭ ކޮމިޓީގެ މެންބަރުންނަށް ބެޖު ހަވާލުކޮށްދެއްވާފައެވެ.