ދިހަ ކުންފުންޏެއްގެ ޑިރެކްޓަރުންގެ ބޯޑުން ގިނަ ބޭފުޅުންތަކެއް ވަކިކޮށްފި
އެޗްޑީއެފްސީގެ ބޯޑުން ދެބޭފުޅަކު ވަކިކޮށް، އެއް ބޭފުޅެއްވަނީ އައްޔަންކޮށްފައި
އެޗްޑީއެފްސީ
ސަރުކާރު ހިއްސާވާ 10 ކުންފުންޏެއްގެ ޑިރެކްޓަރުންގެ ބޯޑުން ގިނަ ބޭފުޅުންތަކެއް ވަކިކޮށްފިއެވެ.
އާދިއްތަ ދުވަހު ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ) ބުނީ ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ބޯޑަށް 8 އޯގަސްޓް 2024 ގައި ބައެއް ބަދަލުތައް ގެނެސްފައިވާ ކަމަށެވެ.
10 ކުންފުންޏެއްގެ ޑިރެކްޓަރުންގެ ބޯޑަށް ބަދަލު ގެނެސްފައިވާއިރު، ހައުސިން ޑިވެލޮޕްމަންޓް ފައިނޭންސް ކޯޕަރޭޝަން ލިމިޓެޑްގެ ބޯޑުން ދެބޭފުޅަކު ވަކިކޮށް، އެއް ބޭފުޅެއްވަނީ އައްޔަންކޮށްފައެވެ.
އައްޑޫ އިންޓަރނޭޝަނަލް އެއަރޕޯޓު ޕްރައިވެޓް ލިމިޓެޑްގެ ބޯޑުން ތިން ބޭފުޅެއް ވަކިކޮށްފައިވެއެވެ. ބިޒްނަސް ސެންޓަރ ކޯޕަރޭޝަން ލިމިޓެޑުގެ ބޯޑުން ދެ ބޭފުޅުން ވަކިކޮށްފައިވެއެވެ. އަދި ފަހި ދިރިއުޅުން ކޯޕަރޭޝަން ލިމިޓެޑުގެ ބޯޑުން އެކަކު ވަކިކޮށްފައިވެއެވެ.
މީގެ އިތުރުން ފެނަކަ ކޯޕަރޭޝަން ލިމިޓެޑްގެ ބޯޑުން ތިން ބޭފުޅުން، ޕޮލިސް ވެލްފެއަރ ކޯޕްރޭޝަންގެ ބޯޑުން އެއްބޭފުޅެއް، އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން ޕްރައިވެޓް ލިމިޓެޑްގެ ބޯޑުން އެއްބޭފުޅެއް، ޓްރޭޑްނެޓް މޯލްޑިވްސް ކޯޕަރޭޝަން ލިމިޓެޑްގެ ބޯޑުން އެއްބޭފުޅެއް އަދި ވޭސްޓް މެނޭޖްމަންޓް ކޯޕަރޭޝަން ލިމިޓެޑްގެ ބޯޑުން ތިން ބޭފުޅުން ވަނީ ވަކިކޮށްފައެވެ.
ސަރުކާރު ހިއްސާވާ 10 ކުންފުންޏެއްގެ ޑިރެކްޓަރުންގެ ބޯޑުން ގިނަ ބޭފުޅުންތަކެއް ވަކި ކުރި ސަބަބު ޕީސީބީން ހާމަކޮށްފައިނުވެއެވެ. ރާއްޖޭގެ އިގްތިސާދުގެ ހާލަތު ވަރަށް ބޮޑަށް ދަށް ކަމަށާއި، ހަރަދު ކުޑަކުރުމަށް ކަމަށް ބުނެ، ސަރުކާރުން ދަނީ އެކި ކުންފުނިތަކުން ގިނަ އަދަދެއްގެ މުވައްޒަފުން ވެސް ވަޒީފާއިން ވަކިކުރަމުންނެވެ. ނަމަވެސް ސިޔާސީ މަގާމުތަކަށް އެކި ބޭފުޅުން މިސަރުކާރުން އައްޔަން ކުރައްވައެވެ.
