ރޯޑް ޑިވެލޮޕްމެންޓް (އާރްޑީސީ) އާއި ގުޅޭ ގޮތުން އެސްއޯއީ ކޮމިޓީގައި ނުރަނގަޅު މައުލޫމާތުތަކެއް ފަތުރާފައިވާތީ، އެކަމުގެ ހަގީގަތް ހާމަކުރުމަށް އެ ކޮމިޓީ އަށް ހާޒިރުވެ މައުލޫމާތު ދެވޭނެ މަގު ފަހިކޮށްދިނުމަށް، އާރްޑީސީގެ ކުރީގެ މެނޭޖިން ޑިރެކްޓަރ މޫސާ އަލީ މަނިކް (މޫކޭ) އާއި އާރްޑީސީގެ ކުރީގެ ސީއެފްއޯ ޔާސިރު ހަސަންގެ ފަރާތުން  ވަނީ އެދިފައެވެ.

އެކަމާ ގުޅޭގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމުގައި މޫކޭ ވިދާޅުވީ، އެމްޑީޕީގެ ސަރުކާރުގައި ކުންފުނިތައް ހިންގި ގޮތާ ގުޅޭގޮތުން މިހާރުގެ ސަރުކާރުން ބޮޑެތި އޮޅުވާލުންތަކާއި ދޮގު ތުހުމަތުތަކެއް މަޖިލީހުގައިވެސް ކުރައްވާފައިވާ ކަމަށެވެ.

އާރްޑިސީގެ އޮޑިޓެއް މިހާތަނަށް ހަދާފައިނުވާއިރު، އެ ވާހަކަތައް މަޖިލީހުގައި ދެއްކެވީ އެއްވެސް އަސާސެއް ނެތި ސިޔާސީ މަޤްސަދުގައިކަން މޫކޭ ފާހަގަ ކުރެއްވިއެވެ.

މޫކޭ ވިދާޅުވީ، އާރްޑީސީގެ އޮފީހުން ވައްކަން ކުރުމުގެ މައްސަލަތަކެއް ފެންމަތިވި ކަމަށާއި، އެ މައްސަލަތައް ކަމާބެހޭ ފަރާތްތަކަށް ހުށަހެޅީވެސް އާރްޑީސީން ކަމަށެވެ. އެކަމުގައިވެސް އޮޅުވާލައިގެން މި ސަރުކާރުން އުޅެމުންދާކަމަށް މޫކޭ ވިދާޅުވިއެވެ.

އަދި ޕެޓީކޭޝްއާ ގުޅޭ އޮޅުވާލުންތަކެއްގެ ތުހުމަތުގައި ފުލުހުން އާރްޑިސީގެ އޮފީހަށް އައިސް ގެންދިޔަ ލިއެކިއުންތައް މިހާރުވެސް އާރްޑީސީގެ އޮފީހުގައި ހުންނާނެ ކަމަށާއި، މިހާރުގެ މެނޭޖްމަންޓުން އެ ޙަޤީޤަތްތައް ނުބަލައި ރައްޔިތުންނަށް އޮޅުވާލަމުންދާކަމަށް މޫކޭ ވިދާޅުވިއެވެ.

މޫކޭ އިތުރަށް ވިދާޅުވީ، އާރްޑީސީގެ ދަރަންޏާ ގުޅޭގޮތުން އެކި ފަހަރު އެކި އަދަދުތައް މިހާރުގެ މެނޭޖްމަންޓުން ކިޔަމުންދާ ކަމަށެވެ. އެގޮތުން ކުންފުނީގެ ދަރަނި 300 މިލިއަން ކަމަށާއި، 200 މިލިއަން ކަމަށާއި، 500 މިލިއަން ކަމަށް އެކި ތަންތަނުގައި ވިދާޅުވެ އެންމެ ފަހުން އެސްއޯއީ ކޮމިޓީގައި 800 މިލިއަންކަމަށް ވިދާޅުވިކަމަށްވެސް މޫކޭ ފާހަގަ ކުރެއްވިއެވެ.

މި ކަންކަމުން އެނގެނީ އެބޭފުޅުންނަށް ކަންކަން ސާފުނުވާ މިންވަރާއި ކަންކަން ނުބައްލަވާ މިންވަރު ކަމަށްވެސް މޫކޭ ވިދާޅުވިއެވެ.

މޫކޭ ވިދާޅުވީ، ކުރީ ސަރުކާރުގައި އާރްޑީސީން ގެއްލުވާލާފައިވާކަމަށް މިހާރުގެ މެނޭޖްމަންޓުން ބުނާ 161 މިލިއަން ރުފިޔާ މި ސަރުކާރުން ނުހޯދަނީ ކީއްވެތޯ ސުވާލު އުފެދޭކަމަށެވެ. އެކަމާ އެއްވެސް ސުވާލެއްވެސް ކޮށްލާފައިނުވާކަމަށް މޫކޭ ވިދާޅުވިއެވެ.

 މޫކޭ ވިދާޅުވި ގޮތުގައި އޭރުވެސް ފުލުހުން އާރްޑީސީގެ ޕޮލިސީތަކާ ގުޅޭ ލިއެކިއުންތަކެއް ނުގެންދެއެވެ. އެގޮތުން ޤާނޫނާ ޚިލާފު ކަމެއް ހިނގާފައިވާކަން ނުވަތަ ނޫންކަންވެސް ބޮޑަށް ސާފުވާނީ އެ ލިއެކިއުންތަކާވެސް އެކީގައިކަމަށް މޫކޭ ވިދާޅުވިއެވެ.

މި ނޫސްވެރިންގެ ބައްދަލުވުމުގައި އާރްޑީސީގެ ކުރީގެ ސީއެފްއޯވެސް ވަނީ އެކަންކަން އިތުރަށް ތަފްސީލު ކޮށްދެއްވާފައެވެ.

އޭގެ އިތުރުން، އެމްޑީއާއި ސީއެފްއޯގެ އެކައުންޓަށް ފައިސާ ޖަމާވެފައިނުވާކަން ފުލުހުންވެސް ހާމަކޮށްފައިވާނެކަމަށް އެބޭފުޅުން ފާހަގަ ކުރެއްވިއެވެ.

މޫކޭގެ އިތުރުން ޔާސިރުވެސް ވަނީ އާރްޑީސީން ވައްކަމެއް ކޮށްފައި އޮތްނަމަ ހާމަ ކުރުމަށް ތަކުރާރުކޮށް ސަރުކާރަށް ގޮވާލާފައެވެ.