މެންޗެސްޓަރ ޔުނައިޓެޑުން އޮތީ، އެ ޓީމަށް ކުޅެމުން އަންނަ ބްރެޒިލްގެ މިޑްފީލްޑަރު ކަސެމީރޯ އެ ކުލަބުގައި ނުހުންނާނެ ކަމުގެ އެއްވެސް ސިގުނަލެއް ލިބިފައި ނުވާ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

އޭނާ މިހެން ބުނީ ވާދަވެރި މެންޗެސްޓަރ ސިޓީއާ ދެކޮޅަށް ޔުނައިޓެޑުން ކުޅުނު ކޮމިއުނިޓީ ޝީލްޑް މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގެ ފުރަތަމަ 11 ގައި ހިމެނިގެން ކަސެމީރޯ ވަނީ ކުޅެފަ އެވެ. ކަސެމީރޯގެ ކުރިމަގާ ގުޅޭ ގޮތުން ވާހަކަ ދައްކަމުން ޓެން ހާގް ބުނީ، ކަސެމީރޯ ޔުނައިޓެޑުގައި ނުހުންނާނެ ކަމުގެ އެއްވެސް އިޝާރާތެއް އޭނާ އަށް ނެތް ކަމަށެވެ. އަދި އޭނާ އާމެދު ހިތްހަމަ ޖެހިގެން ތިބި ކަމަށް ވެސް ޓެން ހާގް ވަނީ ބުނެފަ އެވެ.

ސްޕެއިންގެ ރެއާލް މެޑްރިޑުގައި ހުރުމަށްފަހު އުމުރުން 32 އަހަރުގެ ކުޅުންތެރިޔާ ޔުނައިޓެޑަށް ލިބުނީ 2022 ވަނަ އަހަރު އެވެ. އެ ކުލަބާއެކު އޭނާ ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެހެންކަމުން އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2026 އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، ރަނގަޅު ހުށަހެޅުމެއް ލިބިއްޖެ ނަމަ، ޔުނައިޓެޑު ދޫކޮށްލަން ކަސެމީރޯ ބޭނުންވާ ކަމަށް މީޑިއާ ތަކުގައި އޮތީ ރިޕޯޓު ކޮށްފަ އެވެ.

މީޑިއާ ތަކުގައި އޭރު ރިޕޯޓުކޮށްފައިވާ ގޮތުން ކަސެމީރޯ ހޯދުމަށް، ސައުދީ އަރަބިޔާގެ ސައުދީ ޕްރޯ ލީގުގެ ބައެއް ކުލަބުތަކުން ޝައުޤުވެރިވެ އެވެ. އޭޕްރީލް މަހުން ފެށިގެން، ސައުދީ ލީގުގެ ބައެއް ކުލަބުތަކުން އަންނަނީ ކަސެމީރޯ އާއެކު މަޝްވަރާ ކުރަމުން ކަމަށް ވެސް ރިޕޯޓުތައް ބުނެފައިވެ އެވެ. އަދި އޭނާ އަށް ރަނގަޅު ހުށަހެޅުމެއް ލިބިއްޖެ ނަމަ، ކަސެމީރޯ ޔުނައިޓެޑު ދޫކޮށް އެހެން ކުލަބަކަށް ބަދަލުވާނެ ކަމަށް ވެސް މީޑިއާ ތަކުގައި އޮތީ ބުނެފަ އެވެ.

ޔުނައިޓެޑުގައި ހޭދަކުރާ ދެ ސީޒަންގައި ކަސެމީރޯ ވަނީ އެ ކުލަބަށް ކުޅެދިން 84 މެޗުގައި 12 ލަނޑު ޖަހައިފަ އެވެ. ޔުނައިޓެޑާ އެކު އޭނާ ވަނީ ދެ ތައްޓެއް ވެސް ކާމިޔާބު ކޮށްފަ އެވެ. އެއީ ކަރަބޯ ކަޕް އަދި އެފްއޭ ކަޕް އެވެ.