އީރާނުގައި ހުންނަވަނިކޮށް އިޒްރޭލުން ހަމަލާދީ އަވަހާރަ ކޮށްލި ހަމާސްގެ ލީޑަރު އިސްމާއީލް ހަނިއްޔާގެ މަރުގެ ބަދަލު ހިފުމަށް އެ ގައުމުގެ ރޫހާނީ ލީޑަރު އަލީ ޚާމަނާއީ ކުރައްވާފައިވާ އަމުރު ތަންފީޒް ކުރާނޭ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްގެ ޑެޕިއުޓީ ކޮމާންޑަރު ވިދާޅުވެއްޖެއެވެ.
ޑެޕިއުޓީ ކޮމާންޑަރު އަލީ ފަދާވީ ވިދާޅުވި ކަމަށް އީރާނުގެ މީޑިއާ އިން ހުކުރު ދުވަހު ރިޕޯޓް ކޮށްފައިވަނީ އިސްމާއީލް ހަނިއްޔާ ޝަހީދު ކޮށްލުމުގެ ބަދަލު ހިފުމުގެ ގޮތުން އިޒްރޭލަށް ހަރުކަށި އަދަބު ދިނުމަށް އެ ގައުމުގެ ރޫހާނީ ލީޑަރު ކުރައްވާފައިވާ އަމުރަކީ ވަރަށް ސާފު ސަރީހަ އަމުރެއް ކަމަށާއި، އެ އަމުރު ތަންފީޒް ކުރެވެން އޮތް އެންމެ ރަނގަޅަށް އީރާނުގެ އަސްކަރިއްޔާ އިން ތަންފީޒް ކުރާނެ ކަމަށެވެ.
ހަނިއްޔާ އަވަހާރަ ކޮށްލީ މި ދިޔަ ޖުލައި މަހު އީރާން ރައީސް މަސްއޫދު ޕެޒެޝްކިއާން މަގާމުގެ ހުވައި ކުރެއްވުމުގެ ރަސްމިއްޔާތައް ވަޑައިގެން އުޅުއްވަނިކޮށްނެވެ.
އީރާނުން ބުނެފައިވަނީ ހަނިއްޔާ އަވަހާރަ ކޮށްލީ އިޒްރޭލުން ކަމަށެވެ. އެހެން ނަމަވެސް ހަނިއްޔާ އަވަހާރަ ކޮށްލި ހަމަލާ އާ ގުޅިގެން ސީދާ އެއްޗެއް އިޒްރޭލުން ބުނެފައެއް ނުވެއެވެ. އެ ހަމަލާ ނުދޭ ކަމަކަށްވެސް އިޒްރޭލުން ބުނެފައެއް ނުވެއެވެ.
ހަނިއްޔާ އަވަހާރަ ކޮށްލި ހަމަލާއާ އެކު އަވަށްޓެރި ގައުމުތަކުގައި ޓާގެޓް ކޮށްގެން މީހުން މަރާފައިވާ ކަމުގެ ރެކޯޑް އޮތް އިޒްރޭލަށް ބަދަލު ހިފުމުގެ ގޮތުން ވަރުގަދަ އަދަބެއް ދޭނެ ކަމަށް އީރާނުން ވަނީ ބުނެފައެވެ.
އީރާނުގެ ރިވޮލިއުޝަނަރީ ގާޑުގެ ޑެޕިއުޓީ ކޮމާންޑަރުގެ މި ވާހަކަ އަށް ބުނާނީ ކީކޭތޯ ހުކުރު ދުވަހު އޮތް ނޫސް ކޮންފަރެންސެއްގައި އެމެރިކާގެ ވައިޓް ހައުސްގެ ނޭޝަނަލް ސެކިއުރިޓީ އާ ބެހޭ ތަރުޖަމާނު ޖޯން ކާބީ އަށް ސުވާލު ކުރުމުން ބުނީ އެމެރިކާ އިން އިޒްރޭލް ދިފާއު ކުރުމަށް ސަރަހައްދުގައި އެކަށީގެންވާ ވަސީލަތްތައް އެބަހުރި ކަމަށެވެ.
އީރާން އާއި އިޒްރޭލުގެ ދެމެދުގައި ހަނގުރާމަ އެއް ފެށިދާނެ ކަމުގެ ނުތަނަވަސްކަން ބޮޑު ވެފައި ވަނިކޮށް ހުސްވި ހަފްތާގައި އެމެރިކާ އިން ވަނީ އިތުރު އަސްކަރީ ސާމާނު މެދުއިރުމައްޗަށް ފޮނުވާފައެވެ. އޭގެ ތެރޭގައި އެއަރކްރާފްޓް ކެރިއަރާއި ހަނގުރާމަމަތީ މަތިންދާ ބޯޓު ހިމެނެއެވެ.
