ކުރިއަށް އޮތް 5 ދުވަހު މޫސުން ގޯސް، ގަދަވާރެޔާއެކު ފެން ބޮޑުވެދާނެކަމަށް ބަލައި ތައްޔާރުވެ ތިބުމަށް އެންޑީއެމްއޭއިން އެދިއްޖެ
މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ އަޅަންޖެހޭ ފިޔަވަޅުތައް އެޅުމަށް އެދިފައިވޭ
މީގެ ކުރިން ކުރި ވިއްސާރައިގައި މާލޭގެ ބައެއް މަގުތަކުގައި ފެންބޮޑުވުން
އާދިއްތަ ދުވަހުން ފެށިގެން ކުރިއަށް އޮތް 5 ދުވަހު ރާއްޖޭގެ ބޮޑު ބަޔަކަށް މޫސުން ގޯސްވާތީ އެކަމަށް ސަމާލުވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސް ކޮށްފިއެވެ.
އެ އިދާރާއިން ނެރުނު ނޫސްބަޔާނެއްގައި ބުނީ، އާދިއްތަ ދުވަހުން ފެށިގެން 5 ދުވަހުގެ މުއްދަތަކަށް މޫސުން ގޯސްވާނެކަމަށް ބެލެވޭ ކަމަށާއި، ރާއްޖޭގެ ބޮޑު ބަޔަކަށް މޫސުމުގެ ބާރު ގަދަވާނެ ކަމަށެވެ.
އެންޑީއެމްއޭއިން ބުނީ، ރާއްޖޭގެ ބޮޑު ބަޔަކަށް ގުގުރުމާއެކު ވިއްސާރަކޮށް، ބޯކޮށް ވާރޭވެހި، ވިލާގަނޑުގައި ގަޑިއަކު 40 މޭލާއި 45 މޭލަށް ވައިބާރުވާނެ ކަމަށާއި، ވިލާގަނޑުގައި ކަނޑުތައް ގަދަވާނެކަމަށް މޫސުމާބެހޭ އިދާރާއިންވެސް މައުލޫމާތު ދީފައިވާ ކަމަށެވެ.
އެހެންކަމުން ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ އަޅަންޖެހޭ ފިޔަވަޅުތައް އެޅުމަށް އެ އިދާރާއިން ވަނީ އިލްތިމާސް ކޮށްފައެވެ.
އޭގެ ތެރޭގައި ވާރޭވެހި ފެން ބޮޑުވެދާނެކަމަށް ތައްޔާރުވުމާއި، ގެއަށް ފެން ނުވަންނާނެހެން ރައްކާތެރި ފިޔަވަޅު އެޅުމާއި، ގަދަވަޔަށް ސަމާލުވުމަށް އަޅަން ޖެހޭ ފިޔަވަޅުތައް އެޅުން ފަދަ ކަންކަން ހިމެނެއެވެ.
އޭގެ އިތުރުން، އެ ކަންކަމަށް ރަށު ފެންވަރުގައިވެސް އިދާރާތަކުން ހޭލުންތެރިކަން އިތުރު ކޮށްދިނުމަށް އެންޑީއެމްއޭއިން ވަނީ އެދިފައެވެ.
