ސަރުކާރުގެ ވިސްނުން ހުއްޓިފައި ވަނީ އެންމެ ދިމާލަކަށް، އެއީ އެތެރޭގެ ކޯޅުމެއް - ޝާހިދު
8 އޯގަސްޓު 2024 | ބުރާސްފަތި 09:56ސަރުކާރުން އިންޑިއާ އަށް މަރުހަބާ ކިޔާ، އިންޑިއާ އާއި ރާއްޖޭގެ ގުޅުން ރަނގަޅުކުރުމަކީ ކުރައްވާ އުއްމީދެއް ކަމަށް ޝާހިދު ވަނީ ވިދާޅުވެފަ
އެމްޑީޕީގެ ރައީސް އަބްދުﷲ ޝާހިދު، އެމްޑީޕީގެ ގައުމީ މަޖިލީހުގައި ވާހަކަދައްކަވަނީ
ސަރުކާރުގެ ވިސްނުން ހުއްޓިފައި ވަނީ އެންމެ ދިމާލަކަށް ކަމަށާއި، ސަރުކާރުގެ މިސްރާބު ހިފާފައި ހުރީ އެތެރޭގެ ކޯޅުމަކާއި ދިމާލަށް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ އެމްޑީޕީގެ ޤައުމީ މަޖިލީހުގައި ވާހަކަދައްކަވަމުންނެވެ.
ސަރުކާރުގެ އެތެރޭގެ ކޯޅުން އިންތިހާއަށް ގޮސް، ދެކެވޭ ނުދެކެވޭ ވާހަކައެއް ނޭނގޭ ހިސާބަށް ކަންކަން ގޮސްފައިވާ ކަމަށް އެ މަނިކުފާނު ވަނީ ވިދާޅުވެފައެވެ. މީގެ އިތުރުން ޝާހިދު ވިދާޅުވީ ޤާނޫނު އަސާސީގެ މުޅި މަޙްފޫމަކީ ބާރުތައް ވަކިވެފައިވާ ވެރިކަމެއް ކުރުން ކަމަށެވެ. ގާނޫނުއަސާސީ ދިވެހިންނާ ހަމައަށް ގެނެސްދީފައި ވަނީ އެމްޑީޕީން ވަރަށް ބުރަކޮށް މަސައްކަތް ކޮށްގެން ކަމަށް ވެސް އެ މަނިކުފާނު ވިދާޅުވިއެވެ. އެއްބާރު އަނެއްބާރުގެ މައްޗަށް ބާރުވެރިވެ ފާރަވެރިވާ މަޖިލީހަކާއި، ސަރުކާރުގެ ނުފޫޒެއް ނެތް ޝަރުޢީ ނިޒާމެއް ޤާއިމްވުމަކީ ޤާނޫނު އަސާސީގެ އެންމެ ވަރުގަދަ އެއް ސިފަ ކަަމަށް ޝާހިދު ވަނީ ވިދާޅުވެފައެވެ. ނަމަވެސް މިއަދު އޮއެވަރު ހުރީ ޤާނޫނު އަސާސީ އާއި ސީދާ އިދިކޮޅަށް ކަމަށް އެ މަނިކުފާނު ވަނީ ވިދާޅުވެފައެވެ. އަދި ރައްޔިތުންގެ މަޖިލީހުގެ މުޅި ނިޒާމު ތަޣައްޔަރުވެ، މިސްރާބު ޖަހާފައިވަނީ ބާރުތައް އެއްކޮށްލުމާ ދިމާލަށް ކަމަށް ފާހަަގަކުރައްވާ ޝާހިދު ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. މިއަދުގެ ސަރުކާރުން މަސައްކަތް ކުރަނީ 16 އަހަރު ވަންދެން ޤާނޫނު އަސާސީގެ ދަށުން މަސައްކަތް ކުރި ރޫހާއި ސީދާ އިދިކޮޅަށް ކަމަށް ޝާހިދު ވިދާޅުވިއެވެ.
މިހާރު ތަރައްޤީގެ މަޝްރޫޢުތައް ހުއްޓިފައިވާތީ އެކަމާއި މެދު ވެސް ޝާހިދު ވަނީ ކަންބޮޑުވުން ފާޅުކުރައްވާފައެވެ. ރާއްޖޭގެ އެކި ދިމަދިމާލުގައި ތަރައްޤީގެ މަޝްރޫޢުތައް ހުއްޓިފައި ކުރިއަށް ނުގޮސް އެބަ ހުރި ކަމަށް ޝާހިދު ވަނީ ވިދާޅުވެފައެވެ. މީގެ އިތުރުން ސަރުކާރުގެ ގޮތެއް ނެތުމުގެ ގެއްލުން ވަނީ ދިވެހިންނަށް ކަމަށް ޝާހިދު ވިދާޅުވިއވެެ. އެގޮތުން ސަރުކާރުގެ އަމަލުތަކުގެ ސަބަބުން، ރާއްޖެ އަންނަ އިންޑިއާ ފަތުރުވެރިންގެ އަދަދު %43 ދަށްވެފައިވާ ކަމަށް ޝާހިދު ވިދާޅުވިއެވެ. އަދި ސަރުކާރުން އިންޑިއާ އަށް މަރުޚަބާ ކިޔާ، އިންޑިއާ އާއި ރާއްޖޭގެ ގުޅުން ރަނގަޅުކުރުމަކީ ކުރައްވާ އުންމީދެއް ކަމަށް ޝާހިދު ވަނީ ވިދާޅުވެފައެވެ.
