ފަސޭހައިން ދެވަނަ މެޗު ކާމިޔާބުކޮށް، އިތާ އިންޓަރ ރިސޯރޓް ވޮލީބޯޅަ މުބާރާތުގެ ސެމީފައިނަލްގެ އުއްމީދު ކުޑަފުށިން ހޯދައިފި އެވެ.

ކުޑަފުށި މޯލްޑިވްސް ދެވަނަ މެޗު ކާމިޔާބުކުރީ އިންޓަރކޮންޓިނެންޓަލް މޯލްޑިވްސް މާމުނަގާ ރިސޯޓާ ވާދަކޮށް ސީދާ ތިން ސެޓުންނެވެ. މެޗުގެ ސެޓްތައް ކުޑަފުށިން ގެންދިޔައީ 25-14, 25-16, 25-21 ނެވެ. މެޗުގެ މޮޅު ކުޅުންތެރިއަކީ ކުޑަފުށީގެ ރޯޝަން އުދަޔަންގާ އެވެ. މުބާރާތުގެ ފުރަތަމަ މެޗުގައި ކުޑަފުށި ވަނީ ވާދަވެރި ކުޅުމަކަށްފަހު ޖޯލި ބީންއާ ވާދަކޮށް 3-2 ސެޓުން ބަލިވެފައެވެ. މާމުނަގާ ވަނީ ފުރަތަމަ މެޗު ކާމިޔާބުކޮށްފައެވެ. އެއީ މީދުއްޕަރާ ވާދަކޮށް 3-2 ސެޓުންނެވެ.

މުބާރާތުގައި ބުރާސްފަތި ދުވަހުގެރޭ ވާދަކުރާނީ ޖޯލި މޯލްޑިވްސް އާއި ރީތިފަރެވެ. މި މުބާރާތުގައި އަތޮޅުގެ 8 ރިސޯރޓުން ވާދަކުރެއެވެ. މިއީ މީދޫ އެކުވެރި ކްލަބުން ބާއްވާ މުބާރާތެކެވެ.