ރައީސް މުއިއްޒުގެ ސަރުކާރުން މަސައްކަތް ކުރަނީ ރައްޔިތުންގެ ބާރު ކަނޑުވާލުމަށް: ފައްޔާޒު
ގާނޫނު އަސާސީން ރައްޔިތުންނަށް ލިބިދީފައިވާ ހައްގުތައް ދަނީ ހަނިކުރަމުން
ެއެމްޑީޕީ ގައުމީ މަޖިލިސް ބައްދަލުވުމުގެ ތެރެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން މަސައްކަތް ކުރަނީ ރައްޔިތުންގެ ބާރު ކަނޑުވާލުމަށް ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.
ބުދަ ދުވަހުގެ ރޭ ކުރިއަށް ގެންދިޔަ އެމްޑީޕީގެ ގައުމީ މަޖިލީހުގެ ބައްދަލުވުމުގައި ފައްޔާޒުވަނީ މިއަދުގެ ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަދައްކަވާފައެވެ. އެގޮތުން ލާމަރުކަޒީ ނިޒާމު ފުޑާލުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލެއްވިއެވެ.
ފައްޔާޒު ވިދާޅުވީ މިސަރުކާރުން ރައްޔިތުންގެ ބާރު ކަނޑުވާލުމުގެ މަސައްކަތް މަޑުމަޑުން ފަށައިގެން ކުރިއަށް ގެންދާ ކަމަށާއި، ގާނޫނު އަސާސީން ރައްޔިތުންނަށް ލިބިދީފައިވާ ހައްގުތައް ހަނިކުރުމުގެ މަސައްކަތް ކުރަމުންދާ ކަމަށެވެ. ނަމަވެސް ރައްޔިތުންނަށް ހޯދަދީފައިވާ މިހައްގުތަކަކީ ވަރަށް ބުރަ މަސައްކަތުން ހޯދާދީފައިވާ ހައްގުތަކެއްކަން ފައްޔާޒު ފާހަގަކުރެއްވިއެވެ.
މިއަދުގެ ސަރުކާރަކީ ގާނޫނު އަސާސީގެ ހަަމަތައް ގަބޫލުކުރާ ސަރުކާރެއް ނޫންކަން ފާހަގަކުރައްވައި ފައްޔާޒު ވިދާޅުވީ މި ސަރުކާރުގެ ބޭފުޅުން ޑިމޮކްރަސީގެ ހަމަތައް ވެސް ގަބޫލުނުކުރައްވާ ކަމަށެވެ.
އެގޮތުން ލާމަރުކަޒީ ނިޒާމު އެއްކޮށް ބަދަލުކޮށް، ރައްޔިތުންގެ ބާރު އެއްކޮށް ކަނޑުވާލައި، ރަށްރަށުގެ ކައުންސިލްތައް އުވާލާ މަރުކަޒު ކުރުމުގެ މަސައްކަތް މިސަރުކާރުން ފަށާފައިވާ ކަމަށް ފައްޔާޒު ވިދާޅުވިއެވެ.
ފައްޔާޒު މިމޭރުމުން ވާހަކަދައްކަވާފައިވާއިރު، ބުދަ ދުވަހު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ލޯކަލް ކައުންސިލުތަކުގެ ބައި-އިލެކްޝަންތައް ބާއްވާ މުއްދަތު ލަސްކުރެވޭ ގޮތަށް ލާމަރުކަޒީ ގާނޫނާއި އަދި ލޯކަލް ކައުންސިލުތަކުގެ އިންތިޚާބުގެ ގާނޫނަށް ހުށަހެޅި އިސްލާހު ވަނީ ފާސްކޮށްފައެވެ. މި ދެ ގާނޫނު ވެސް ފާސްކުރީ ވޯޓުގައި ބައިވެރިވި 74 މެންބަރުންގެ ތެރެއިން 67 މެންބަރުންގެ ވޯޓުންނެވެ.
