ޗެލްސީ އަށް ބަދަލުވާން ނިންމި ނިންމުމަކީ ރަނގަޅު ނިންމުމެއް ކަމަށް، އެ ކުލަބަށް ކުޅެމުން އަންނަ އެކުއެޑޯގެ ޑިފެންސިވް މިޑްފީލްޑަރު މޮއިސަސް ކައެސޭޑޯ އެވެ.

ބްރައިޓަން ގައި ހުރުމަށް ފަހު، އުމުރުން 22 އަހަރުގެ ކުޅުންތެރިޔާ ޗެލްސީ އަށް ބަދަލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. ޗެލްސީން އޭނާގެ ސޮއި ހޯދިއިރު، ވާދަވެރި ލިވަޕޫލުން ވެސް ވަނީ އޭނާ ހޯދުމަށް މަސައްކަތް ކޮށްފަ އެވެ. މީޑިއާ ތަކުގައި ބުނެފައިވާ ގޮތުން ލިވަޕޫލަށް ބަދަލުވާން ކައެސޭޑޯ އެއްބަސް ވެސްވި އެވެ. ނަމަވެސް ފަހު ވަގުތު ނިންމުން ބަދަލުކޮށް، އޭނާ ވަނީ ޗެލްސީ އާއެކު އަށް އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ކައެސޭޑޯ ބުނީ، އަދި ވެސް މީގެ އެއް އަހަރު ކުރީގެ ހަނދާންތައް ހުންނަ ކަމަށެވެ. ޚާއްސަކޮށް އޭނާ އަށް ނިންމަން ޖެހުނީ ވެސް އުނދަގޫ ނިންމުމެއް ކަމަށް ކައެސޭޑޯ ބުންޏެވެ. ޚާއްސަކޮށް ލިވަޕޫލަކީ ބޮޑު ކުލަބެއް ކަމަށާއި، އެ ފަދަ ވަގުތެއްގައި ނިންމުމެއް ނިންމަށް އުނދަގޫވި ކަމަށް އޭނާ ބުންޏެވެ.

އެހެން ނަމަވެސް، ދުވަސްތަކެއް ވަންދެން އޭނާ އާއެކު ޗެލްސީ އޮތް ކަމަށާއި، އެ ކުލަބަށް ބަދަލުވާާން ލިބުނު ފުރުސަތު ނަގާލަން ބޭނުން ނުވީ ކަމުގައި އޭނާ ވަނީ ބުނެފަ އެވެ. އޭނާ އަށް އެންމެ އުނދަގޫވި ވަގުތުގައި ވެސް ޗެލްސީ އޮތް ކަމަށާއި، އެ ކުލަބަށް ބަދަލުވާން ނިންމަން ޖެހުނު އުނދަގޫ ނިންމުމަކީ، ރަނގަޅު ނިންމުމެއް ކަމަށް ކައެސޭޑޯ ޤަބޫލު ކުރެ އެވެ.

އޭނާ ވަނީ ޗެލްސީ އަށް ބަދަލުވެ އެ ކުލަބަށް ކުޅެދިން 48 މެޗުގައި އެއް ލަނޑު ޖަހައިފަ އެވެ. ޗެލްސީ އާއެކު މިހާރު އޭނާ ތައްޔާރު ވަމުން އަންނަނީ ކުރިއަށް އޮތް ސީޒަނަށެވެ.