ފައިނަލްގައި ސްޕެއިން އާއި ފްރާންސްގެ ކުރިމަތިލުމެއް

ފްރާންސްގެ ޕެރިހުގައި ކުރިއަށްދާ އޮލިމްޕިކްސްގެ ފުޓުބޯޅަ ފައިނަލްގައި ސްޕެއިން އާއި، އޮލިމްޕިކްސް ބާއްވާ ޤައުމު ފްރާންސް ވާދަކުރަން ޖެހިއްޖެ އެވެ.

މުބާރާތުގެ ފައިނަލްގެ ޖާގަ ސްޕެއިން އިން ހޯދީ ހޯމަ ދުވަހުގެ ރޭ ކުޅުނު ފައިނަލްގައި މޮރޮކޯގެ މައްޗަށް ކުރި ހޯދައިގެންނެވެ. މޮރޮކޯ އިން މެޗުގައި ލަނޑު ޖަހައި ލީޑު ނަގާފައި ވަނިކޮށް، ފަހަތުން އަރައި ދެ ލަނޑު ޖަހައިގެން ސްޕެއިން އިން ވަނީ މެޗު ކާމިޔާބު ކޮށްފަ އެވެ. މެޗުގައި މޮރޮކޯ އަށް ލީޑު ނަގައިދިނީ ސޯފިއަން ރަހީމީ އެވެ. އޭގެ ފަހުން ސްޕެއިންގެ ދެ ލަނޑު ޖެހީ ފާމިން ލޮޕޭޒް އަދި ޖުއާންލޫ ސަންޗޭޒް އެވެ.

ސެމީ ފައިނަލްގެ ދެ ވަނަ މެޗުގައި ފްރާންސް ނިކުތީ މިސްރާ ދެކޮޅަށެވެ. އެ މެޗުގެ ފުރިހަމަ ވަގުތު ހަމަވީ ދެ ޓީމު 1-1 އިން އެއްވަރުވެގެންނެވެ. އިތުރު ވަގުތުގެ ދެ ހާފު ކުޅުނުއިރު، ފްރާންސް އިން ވަނީ ދެ ލަނޑު ޖަހައިގެން، 3-1 އިން މެޗު ކާމިޔާބު ކޮށްފަ އެވެ. މެޗުގައި ފްރާންސްގެ ލަނޑުތައް ޖެހީ ފިލީޕް މަޓޭޓާ އަދި މައިކަލް އޮލީސޭ އެވެ. މަޓޭޓާ ވަނީ އިތުރު ވަގުތަށް ކުޅުނު ހާފުގައި ދެ ވަނަ ލަނޑެއް ވެސް ޖަހައިފަ އެވެ. މެޗުގައި މިސްރުގެ ލަނޑު ޖެހީ މަހުމޫދު ސަބާ އެވެ.

އޮލިމްޕިކްސް ފުޓުބޯޅައިގެ ފައިނަލް އޮންނާނީ ހުކުރު ދުވަހު އެވެ.