ބަންގްލަދޭޝްގެ އިދިކޮޅު ލީޑަރ، ކުރީގެ ބޮޑު ވަޒީރު ޚާލިދާ ޒިޔާ މިނިވަން ކުރުމަށް ބަންގްލަދޭޝްގެ ރައީސް މުހައްމަދު ޝަހާބުއްދީން އަމުރު ކުރައްވައިފިއެވެ.

ޚާލިދާ މިނިވަން ކުރުމުގެ އަމުރު ބަންގްލަދޭޝްގެ ރައީސް ނެރުއްވީ ބޮޑު ވަޒީރު ހަސީނާ މަގާމުން އިސްތިއުފާ ދެއްވާ ގައުމުން ފިއްލަވާ ވަޑައިގެންނެވިތާ މަދު ގަޑީއިރެއްގެ ތެރޭގައެވެ.

ބަންގްލަދޭޝްގެ ރައީސްގެ މީޑިއާ ޓީމުން ހާމަ ކުރި ބަޔާނުގައި ބުނެފައިވަނީ ރައީސް ޝަހާބުއްދީން ރިޔާސަތު ބެލެހެއްޓެވި ބައްދަލުވުމަކުން އިއްތިފާގުން ބަންގްލަދޭޝްގެ ނޭޝަލިސްޓް ޕާޓީ (ބީއެންޕީ) ގެ ޗެއަރޕާސަން ބޭގަމް ޚާލިދާ ޒިޔާ ވަގުތުން މިނިވަން ކުރުމަށް ފާސްކޮށްފައިވާ ކަމަށެވެ.

މި ބައްދަލުވުމުގައި އަސްކަރިއްޔާގެ ވެރިޔާ ވަޤާރުއްޒަމާން އާއި ނޭވީ އާއި އެއަރފޯސްގެ ވެރިންނާއި އިދިކޮޅު ސިޔާސީ ޕާޓީ ތަކުގެ ވެރިން ބައިވެރިވެ ވަޑައިގެންނެވި ކަމަށް މީޑިއާ ރިޕޯޓްތައް ބުނެއެވެ.

އުމުރުފުޅުން 78 އަހަރުގެ ޚާލިދާ ޒިޔާ އަކީ ދެ ފަހަރެއްގެ މަތިން ބަންގްލަދޭޝްގެ ބޮޑު ވަޒީރުކަން ކުރައްވާފައިވާ ބޭފުޅެކެވެ. އޭނާ ޖަލަށް ލާފައިވަނީ 2018 ވަނަ އަހަރު ކަރަޕްޝަންގެ ކުށް ސާބިތުވެ 17 އަހަރުގެ ޖަލުގެ ހުކުމެއް ތަންފީޒް ކުރުމުގެ ގޮތުންނެވެ.

ޖަލު ހުކުމެއްގައި ހުންނެވި ނަމަވެސް ޚާލިދާގެ ސިއްހީ ހާލަތު ދައްވުމުގެ ސަބަބުން އޭނާ އޮންނެވީ ހޮސްޕިޓަލުގައި އެތުމަތި ކޮށްފައެވެ.

ހަސީނާ އާއި ޚާލިދާ އަކީ ސިޔާސީ ދެ ހަތުރުންގެ ގޮތުގައި ފާހަގަ ކުރެވޭ ދެ ބޭފުޅުންނެވެ. ހަސީނާގެ ވެރިކަމުގައި ޚާލިދާގެ މައްޗަށް ސާބިތުވި ކުށަކީ ޔަތީމު ޚާނާ އަކަށް އެހީއެއްގެ ގޮތުގައި ލިބުނު 250،000 އެމެރިކާ ޑޮލަރަށް ޚިޔާނާތްތެރި ވުމެވެ.

ހުކުމާ ގުޅިގެން ޚާލިދާގެ ޕާޓީން ބުނެފައިވަނީ އެއީ ޚާލިދާ ސިޔާސީ ކަންކަމުން އެއްފަރާތް ކުރުމުގެ ރޭވުމުގެ ދަށުން އޭނާގެ މައްޗަށް ނުހައްގުން އިއްވި ހުކުމެއް ކަމަށެވެ.

ޚާލިދާގެ އިތުރުން މުޒާހަރާ އާ ގުޅިގެން ބަންގްލަދޭޝްގެ ފުލުހުން ހައްޔަރު ކުރި އެންމެ މިނިވަން ކުރުމަށްވެސް ވަނީ ނިންމާފައެވެ.

ރިޕޯޓްތައް ބުނާ ގޮތުގައި ހަސީނާގެ ވެރިކަން ނިމުމަކަށް ގެނައި މުޒާހަރާތަކުން 2000ށް ވުރެ ގިނަ މީހުން ތިބީ ހައްޔަރު ކޮށްފައެވެ.