ހަގީގަތުގައި ރައީސް މުއިއްޒު ބޭނުންފުޅުވަނީ ކައުންސިލްގެ ސައިޒް ކުޑަކުރާކަށް ނޫން، ކައުންސިލްތައް ސައިޒްކުރަން - ހިސާން
މިއަދު ބޭނުން ވަނީ މާލޭގައި ހުންނަ މީހަކު ރަށުގެ ކަންކަން ނިންމުމުގެ ބަދަލުގައި ރަށުގައި ހުންނަ، ރަަށުގެ މީހާ ކަންކަން ނިންމޭނެ ނިޒާމެއް ކަމަށް ހިސާން ވިދާޅުވި
އެމްޑީޕީން ހޯމަ ދުވަހުގެ ރޭ ބޭއްވި ޕެނަލް ޑިސްކަޝަންގެ ތެރެެއިން
ހަގީގަތުގައި ރައީސް ޑރ.މުހައްމަދު މުއިއްޒު ބޭނުންފުޅު ވަނީ ކައުންސިލްތަކުގެ ސައިޒް ކުޑަކުރަން ނޫން ކަމަށާއި ބޭނުންފުޅު ވަނީ ކައުންސިލްތައް ސައިޒްކުރަން ކަމަށް އެމްޑީޕީގެ ނައިބު ރައީސް އަދި މަޖިލީހުގެ ތުޅާދޫ ދާއިރާގެ ކުރީގެ މެމްބަރު ހިސާން ހުސައިން ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން ހޯމަ ދުވަހުގެ ރޭ ބޭއްވި ޕެނަލް ޑިސްކަޝަންގައި ވާހަކަދައްކަވަމުންނެވެ.
މިއަދު ބޭނުން ވަނީ މާލޭގައި ހުންނަ މީހަކު ރަށުގެ ކަންކަން ނިންމުމުގެ ބަދަލުގައި ރަށުގައި ހުންނަ، ރަަށުގެ މީހާ ކަންކަން ނިންމޭނެ ނިޒާމެއް ކަމަށް ހިސާން ވިދާޅުވިއެވެ. ހިސާން ވިދާޅުވީ ލާމަރުކަޒީ ނިޒާމް ފެށިގެން އައީ ވެސް ކަތީބު ނިޒާމާއި ދެކޮޅަށް ކަމަށެވެ. އެ ނިޒާމަކީ މާލޭގައި ހުންނަ އިދާރާއަކުން އަންގާ ގޮތަށް ނޫން ގޮތަކަށް ރަށުގެ ކަންތައްތައް ނުނިންމޭ ހިސާބަށް ދިއުމުން، ރައްޔިތުންގެ ހިތްހަމަނުޖެހުން ބޮޑުވެ، އެކަމުގެ ސަބަބުން ފެށުނު މަޝްވަރާތަކެއްގެ ތެރެއިން އައި ކަމެއް ކަމަށް ހިސާން ވިދާޅުވިއެވެ. ލާމަރުކަޒީ ނިޒާމް އުފެދިގެން އައީ ކަތީބުން ބޭނުން ނުވެގެން ރައްޔިތުން ފާޅުކުރި ޝުއޫރުތަކާއި އެކުގައި ކަަމަށް ހިސާން ވަނީ ވިދާޅުވެފައެވެ. ހިސާން ވަނީ އެއީ އިސްލާހީ މަސައްކަތުގެ ތެރެއިން ކުރެވުނު ވަރަށް މުހިންމު މަސައްކަތެއް ކަމަށް ވެސް ވިދާޅުވެފައެވެ. މަރުކަޒީ ބާރުވެރިކަމާއި، ރަށްރަށުގެ ވެރިން ކޮންރޯލްކުރަން މާލޭގައި ހުންނަ ވެރި މީހާ ބޭނުން ކުރާ ހަތިޔާރެއް ގޮތަށް ލާމަރުކަޒީ ނިޒާމް އޮތުމަކީ ރައްޔިތުން ބާރުވެރިކުރުވޭނެ ގޮތެއް ނޫން ކަމަށް ވެސް ހިސާން ވިދާޅުވިއެވެ.
ރައީސް މުއިއްޒު ވަނީ ތަފާތު އެކި ޕްލެޓްފޯމްތަކުގައި ކައުންސިލަރުން މަދުކުރުމަށް ބާރު އަޅުއްވާ ވާހަކަދައްކަވާފައެވެ. އެކަމަށް އިޝާރާތްކުރައްވާ ހިސާން ވިދާޅުވީ ކުދި ކުދި ރަށްތަކުގައި 5-7 ކައުންސިލަރުން ތިބުން މުހިންމު ނޫން ކަމަށް ރައީސް މުއިއްޒު ވިދާޅުވާ ސަބަބާއި މެދު ސުވާލު އުފެދޭ ކަަމަށެވެ. ސަރުކާރު ހިންގާ ނިޒާމަށް ބަލާއިރު ބައެއް ވުޒާރާތަކުގައި 125 މީހުން ސިޔާސީ މީހުން އެބަ ތިބި ކަމަށާއި އެހެންވީމަ ކައުންސިލްތަކުގެ ސައިޒް ކުޑަކުރުމުގެ ވާހަކަ ސަރުކާރުން ދެއްކުމަކީ އެ ނިޔަތާއި މެދު ސުވާލު އުފެދޭ ކަމެއް ކަމަށް ހިސާން ވިދާޅުވިއެވެ. އެއީ ޤަބޫލު ކުރެވޭ ގޮތެއް ނޫން ކަމަށާއި އެމްޑީޕީން އެކަމަށް ތަން ނުދޭނެ ކަަމަށް ހިސާން ވިދާޅުވިއެވެ. ޤާނޫނު އަސާސީގެ ލާމަރުކަޒީ ޤާނޫނުގެ ބާބަކީ ރައީސް ވަރަށް ބޮޑަށް ނުރުހުންވާ، ހިތްޕުޅާ ނުވާ ބާބެއް ކަމަށް ވެސް ހިސާން ވިދާޅުވިއެވެ.
