މާލޭގެ ރައްޔިތުންނަށް ގޯތި ދެއްވަން ކުރީގެ ރައީސްޖުމްހޫރިއްޔާ އިބްރާހިމް މުހައްމަދު ސާލިހު ނިންމެވި ނިންމެވުމަށް މިސަރުކާރުން އޮނަރ ކުރަންޖެހޭ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ ރައީސް ސާލިހު މާލޭގެ ރައްޔިތުންނަށް ގޯތި ދެއްވަން ނިންމެވި ނިންމެވުމަކީ ރަނގަޅު ނިންމެވުމެއް ކަމަށާއި، އެއީ ޝުކުރު އަދާކުރަން ޖެހޭ ކަމެއް ކަމަށެވެ.
އެއީ އެހެން ރައީސުންނަށް ނުކުރެވި އޮތް ކަމެއްކަން ފާހަގަ ކުރައްވައި އުމަރު ވަނީ އެކަމަށް ތައުރީފު ކުރައްވާފައެވެ.
އުމަރު ވިދާޅުވީ، ފްލެޓާއި ގޯތި ލިބޭނެކަމަށް ބަޔާންކޮށް އާންމު މީހަކަށް ސަރުކާރުން ފަތެއް ދިނުމަށްފަހު، އެއަށް "އޮނަރ ކުރަން" ޖެހޭނެކަމަށެވެ.
މީގެ އިތުރުން އުމަރު ވިދާޅުވީ ކުރީ ސަރުކާރުގައި ދޫކޮށްފައިވާ ރިސޯޓުތައް އަތުލަން މަސައްކަތް ނުކުރާ ކަމަށެވެ. ނަމަވެސް އާދައިގެ މީހަކަށް ލިބިފައިވާ 1000 އަކަފޫޓުގެ ގޯއްޗެއް އަތުލަން މަސައްކަތް ކުރާ އަޑު އިވޭ ކަމަށް އުމަރު ވިދާޅުވިއެވެ.
މީހެއްގެ އަތުން އެއްޗެއް އަތުލަންޖެހޭ ހާލަތުގައި މަސައްކަތް ކުރަންޖެހޭނީ ކޯޓު މެދުވެރިކޮށްކަން ފާހަގަކުރައްވައި އުމަރު ވިދާޅުވީ ދައުލަތުގެ އެންމެ އިސްވެރިޔާ ދޭ ލިޔުމަކީ ފަތެއް ކަމަށާއި، އެއީ ގާނޫނީ ޑޮކިއުމަންޓެއް ކަމަށާއި، އެ ޑޮކިއުމަންޓްގައި ވަރު ހުންނާނެ ކަމަށެވެ.
އަޅުގަނޑު އޮޕީނިއަންއަކީ މިހާރު އިބްރާހިމް މުހައްމަދު ސާލިހު ގޯތި ދެއްވަން ނިންމެވި ނިންމެވުމަކީ ވަރަށް ރަނގަޅު ނިންމެވުމެއް އެނގޭތޯ. އެބޭފުޅާ އަށް ޝުކުރު އަދާކުރަންޖެހޭ ކަމެއް. ސަބަބަކީ އެއްވެސް ރައީސް އެއް. ނަޝީދު ނޫނިއްޔާ އަޅުގަނޑު ހަނދާންވާ ގޮތުން ނަޝީދު ދެއްވި ގާތްގަނޑަކަށް 200އެއް ވަަރު. ތެދެއްތޯ. އެކަމަކު އިބްރާހިމް މުހައްމަދު ސާލިހު ލާޖް ސްކޭލްގައި ބޮޑުކޮށް އެނގޭތޯ. އެއީ ވަރަށް މަދުން ނޫނިއްޔާ އެއްވެސް މީހަކު ކޮށްފައި ނެތް ކަމެއް ކުރެއްވީ. އެއީ އަޅުގަނޑުމެން ޝުކުރު އަދާކުރަންޖެހޭ ކަމެއް. އެއްވެސް ރައީސުލްޖުމްހޫރިއްޔާއެއް އިލެކްޓެޑް ރައީސްއަކު ކަމެއް ނިންމަވާފައި އާއްމުންގެ މީހަކަށް ފަތެއް ދިނުމަށްފަހު ފަހަތުން އަންނަ ސަރުކާރަކުން އޮނަރ ކުރަންޖެހޭ އެއަށް އެނގޭތޯ. އެއަށް އޮނަރ ނުކޮށް ދޫކޮށް ނުލެވޭނެ އެނގޭތޯ. އަނެއްކާ އާއްމުންގެ މީހަކަށް ދޭ އެއްޗެއްގެ ވާހަކަ މިދައްކަނީ އެނގޭތޯ.ކުރީގެ ހޯމް މިނިސްޓަރު އުމަރު ނަސީރު
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ހުޅުމާލެ، ގުޅީފަޅު އަދި ގިރާވަރުފަޅުން ވަނީ ބިންދޫކޮށްފައެވެ. ސަރުކާރު ބަދަލުވެގެންދިޔައިރު ބިން ލިބުނު ހުރިހާ އެންމެނަށް ބިން ދޫކޮށް ނިމިފައިނުވެއެވެ. ނަމަވެސް ބިން ދޫކުރިކަމުގެ ލިޔުމާއި، ބިން ލިބުނު ސަރަހައްދު އެނގޭނެ ގޮތަށް ލިޔުން ދޫކޮށްފައިވެއެވެ. ހުޅުމާލެއިން ބައެއް ބިންތައް ދޫކޮށްފައިވާއިރު، ގުޅީފަޅުންނާއި ގިރާވަރުފަޅުން ބިން ދޫކުރާނެ ދުވަހެއް މިސަރުކާރުން ހާމަކޮށްފައިނުވެއެވެ.
މީގެ އިތުރުން ގެދޮރުވެރިޔާ ސްކީމްގެ ދަށުން ދޫކޮށްފައިވާ 4000 ފްލެޓު ވެސް ދޫނުކޮށްވަނީ ހިފަހައްޓާފައެވެ. ފްލެޓުތައް ދޫކޮށްފައިވަނީ އެންމެ ހައްގުވެރިންނަށް ނޫން ކަމަށް ބުނެ، ފްލެޓު ލިސްޓް އަލުން ރިވިއު ކުރާއިރު، ފްލެޓުގެ ފައިނަލް ލިސްޓު އޮކްޓޯބަރު މަސްތެރޭގައި އާއްމުކުރާނެ ކަމަށް 29 ޖުލައި 2024 ބޭއްވި ޕެޓިޝަން ކޮމެޓީގައި ހައުސިން މިިނިސްޓަރު ޑރ. އަލީ ހައިދަރު ވިދާޅުވެފައިވެއެވެ.
