ގަލާޑޯ އަލުން އެނބުރި ރިވާ ޕްލޭޓަށް

އާޖެންޓީނާގެ ރިވާ ޕްލޭޓްގެ ކޯޗުކަށް، މާސެލޯ ގަލާޑޯ ހަމަޖައްސަން ނިންމައިފި އެވެ.

މިއީ ރިވާ ޕްލޭޓުގެ ކޯޗުކަމާ ގަލާޑޯ ހަވާލުވާނެ ދެ ވަނަ ފަހަރެވެ. މީގެ ކުރިން ގަލާޑޯ ވަނީ 2014 ވަނަ އަހަރުން ފެށިގެން، 2022 ވަނަ އަހަރަށް ރިވާ ޕްލޭޓަށް އިރުޝާދު ދީފަ އެވެ. 12 އަހަރު ދުވަހަށްފަހު ގަލާޑޯ ރިވާ ޕްލޭޓް ދޫކޮށްލަން ނިންމީ، ސައުދީ ޕްރޯ ލީގުގެ އަލް އިއްތިހާދަށް ބަދަލުވާށެވެ.

އަލް އިއްތިހާދުގެ ކޯޗުކަމާ ގަލާޑޯ ހަވާލުވީ އެއް އަހަރާއި ބައިގެ މުއްދަތަކަށެވެ. ނަމަވެސް ގަލާޑޯގެ އިރުޝާދުގެ ދަށުން އެ ކުލަބުގެ ނަތީޖާތައް ދަށްވުމުގެ ސަބަބުން، މި އަހަރުގެ މެއި މަހު އަލް އިއްތިހާދުން ވަނީ ގަލާޑޯ މަގާމުން ވަކިކޮށްފަ އެވެ. އޭނާގެ އިރުޝާދުގެ ދަށުން އަލް އިއްތިހާދު ކުޅުނީ 33 މެޗެވެ. އޭގެ ތެރެއިން އެ ޓީމު ވަނީ 15 މެޗުން މޮޅުވެ، 14 މެޗުން ބަލިވެފަ އެވެ. ހަތަރު މެޗަކުން ވަނީ އެއްވަރުވެފަ އެވެ.

ގަލާޑޯ ވަނީ ދެ ވަނަ ފަހަރަށް ރިވާ ޕްލޭޓުގެ ކޯޗުކަމާ ހަވާލުވާން އެއްބަސްވެފެ އެވެ. ކުރިއަށް އޮތް ދުވަސްތަކުގެ ތެރޭގައި އެ ކުލަބުން ރަސްމީކޮށް އެކަން އިއުލާން ކުރާނެ ކަމަށް މީީޑިއާ ރިޕޯޓުތައް ބުނެ އެވެ. ރިވާ ޕްލޭޓުގެ ކޯޗުކަމާ ގަލާޑޯ ހަވާލުވަނީ 2025 ވަނަ އަހަރުގެ ޑިސެމްބަރު މަހުގެ ނިޔަލަށެވެ.

ގަލާޑޯގެ އިރުޝާދުގެ ދަށުން ރިވާ ޕްލޭޓް ވަނީ 424 މެޗު ކުޅެފައެވެ. އޭގެ ތެރެއިން އެ ޓީމު ވަނީ 228 މެޗުން މޮޅުވެ، 85 މެޗުން ބަލިވެފަ އެވެ. 111 މެޗަކުން ވަނީ އެއްވަރުވެފަ އެވެ. ރިވާ ޕްލޭޓާއެކު ގަލާޑޯ ވަނީ ގިނަ ކާމިޔާބީ ތަކެއްވެސް ހޯދާފަ އެވެ. އެ ޓީމާއެކު އޭނާ ވަނީ ޖުމުލަ 14 ތަށި ކާމިޔާބުކޮށްފަ އެވެ. އޭގެ ތެރޭގައި އާޖެންޓީނާގެ ޕްރިމެރާ ޑިވިޝަނާއި، ކޮޕާ އާޖެންޓީނާއާއި ސުޕަރ ކޮޕާ އާޖެންޓީނާ ހިމެނެ އެވެ.