ސެންޓްރަލް އޭޝިއަން ވޮލީ ބޯޅަ އެސޯސިއޭޝަން (ކާވާ) ބީޗު ވޮލީ ބޯޅަ ޗެލެންޖް ކަޕްގެ ރަން މެޑަލް ހޯދި، ޤައުމީ ފިރިހެން ބީޗު ވޮލީ ޓީމު ރާއްޖެ އަތުވެއްޖެ އެވެ.
ބޫޓާން ގައި ކުރިއަށް ދިޔަ މިއަހަރުގެ މުބާރާތުގެ ރަން މެޑަލް ހޯދީ ރާއްޖޭގެ އިސްމާއީލް ސާޖިދު (ކުޑަ ކާއްޓޭ) އާއި އާދަމް ނަސީމް (އެޑަމް)ގެ ޕެއާ އިންނެވެ. މުބާރާތުގެ ރަން މެޑަލް ހޯދި މި ޕެއާ އަށް، ވެލާނާ އިންޓަނޭޝަނަލް އެއާޕޯޓުން އާދިއްތަ ދުވަހުގެ ރޭ މަރުޙަބާ ދަންނަވާފައި ވަނީ ކުޅިވަރާއި ހަށި ހެޔޮ ކަމާ ބެހޭ ވަޒީރު ޢަބްދުﷲ ރާފިޢު އެވެ. މީގެ އިތުރުން ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ އިސްވެރިން ވެސް ވަނީ ބައިވެރިވެފަ އެވެ.
މިއަހަރުގެ މުބާރާތުގެ ފައިނަލްގައި ކުޑަ ކާއްޓޭ އާއި އެޑަމް ވާދަކޮށްފައި ވަނީ ނޭޕާލްގެ ޕެއާއާ ދެކޮޅެވެ. ފައިނަލް މެޗު ރާއްޖޭގެ ޕެއާ އިން ކާމިޔާބު ކުރީ ސީދާ ދެ ސެޓުންނެވެ. މިއަހަރުގެ މުބާރާތުގެ ރަން މެޑަލް ކުޑަ ކާއްޓޭ އާއި އެޑަމް ހޯދީ ކުޅުނު ހުރިހާ މެޗަކުން ވެސް މޮޅުވެގެންނެވެ. ކުޑަ ކާއްޓޭ އާއި އެޑަމްގެ ޕެއާ އިން ވަނީ 2022 ވަނަ އަހަރުގެ މުބާރާތުގެ ރަން މެޑަލް ވެސް ކާމިޔާބު ކޮށްފަ އެވެ. މީގެ އިތުރުބް މިދިޔަ އަހަރު އޮތް ޓުއާ މުބާރާތުގައި ވަނީ ރިހި މެޑަލް ކާމިޔާބު ކޮށްފަ އެވެ.
މިއަހަރުގެ މުބާރާތުގައި ވާދަކުރި ރާއްޖޭގެ ދެ ވަނަ ޕެއާ ބަލިވެފައި ވަނީ ސެމީ ފައިނަލުންނެވެ.
