އިޒްރޭލު ޕާސްޕޯޓު މަނާކުރާނެކަމަށް ބުނެ ސަރުކާރުން "ޖައްސަނީ ފޭކް"، ސަރުކާރު އޮތީ އެމެރިކާގެވެސް ދަށުވެފައި: އުމަރު ނަސީރު
އިޒްރޭލު ޕާސްޕޯޓު "ޕާކް ކޮށްފައި" އޮތީވެސް އެމެރިކާ ރުއްސަންކަމަށް އުމަރު ވިދާޅުވި
އުމަރު ނަސީރު ކުރީގެ ހޯމް މިނިސްޓަރ
އިޒްރޭލު ޕާސްޕޯޓު މަނާކުރާނެކަމަށް ބުނެ ސަރުކާރުން "ފޭކް ޖައްސަމުންދާ" ކަމަށާއި، ސަރުކާރު އޮތީ އެމެރިކާގެވެސް ދަށުވެފައިކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ، މިއަދުގެ ސަރުކާރު އޮތީ އެމެރިކާއާއި އިންޑިއާގެވެސް ދަށުވެފައި ކަމަށެވެ.
އޭގެ އެއް މިސާލެއްގެ ގޮތުން އުމަރު ވަނީ ފަލަސްތީނުގައި އެމެރިކާގެ ވާގިވެރިކަމާއެކު އެހާ ބޮޑު ޤަތުލުއާންމެއް ހިންގަމުންދާއިރު، ރާއްޖެއިން އެމެރިކާއާ ގުޅުން ބަދަހި ކުރުމަށް ކުރާ މަސައްކަތަށް އަލިއަޅުވާލައްވާފައެވެ.
އުމަރު ވިދާޅުވާ ގޮތުގައި އެހެން ދިމާވާން ޖެހެނީ ސަރުކާރުން ހަމައާއި އުސޫލެއް ނުގެންގުޅޭތީއެވެ.
އޭގެ އިތުރުން، މިފަދަ ދަނޑިވަޅެއްގައި ރާއްޖެއިން އެމެރިކާއާ ގުޅުން ބަދަހިކޮށްގެންވެސް ނުވާނެކަމަށް އުމަރު ވިދާޅުވިއެވެ. އެގޮތުން އެންމެ ބޮޑު ޓެރަރިސްޓުންނަކީ އެމެރިކާއާއި އިޒްރޭލުންކަމަށް އުމަރު ސިފަ ކުރެއްވިއެވެ.
މި ސަރުކާރުން އިޒްރޭލު ޕާސްޕޯޓު މަނާ ކުރުމަށްޓަކައި ކުރަމުންދާކަމަށް ބުނާ މަސައްކަތަށް އަލިއަޅުވާލައްވާ އުމަރު ވިދާޅުވީ، ސަރުކާރުން އެކަމުގައި "ފޭކް ޖައްސާ" ކަަމަށެވެ. އެއީ ހަގީގަތުގައި ގަލަމުން ނިންމާލެވެން އޮތް ކަމެއްކަމަށް އުމަރު ވިދާޅުވިއެވެ.
އިޒްރޭލު ޕާސްޕޯޓު "ޕާކް ކޮށްފައި" އޮތީވެސް އެމެރިކާ ރުއްސަންކަމަށް އުމަރު ވިދާޅުވިއެވެ.
އުމަރު އެހެން ވިދާޅުވެފައިވާއިރު، އިޒްރޭލު ޕާސްޕޯޓު ކޮމިޓީގައި އޮންނަތާ 56 ދުވަސް ވަނީ ވެފައެވެ. ސަރުކާރުގެ ފުރިހަމަ ކޮންޓްރޯލް އޮތް މަޖިލީހުން ޖޫން މަހުގެ ތެރޭގައި ހުށަހެޅުނު ދެ ބިލަކާ މެދު ކަން ހިނގައި ދިޔަ ގޮތް މަޖިލީހުގެ ރެކޯޑް ތަކުން އޮތީ ވަރަށް ސާފުކޮށް ފެންނާށެވެ. އިޒްރޭލް ޕާސްޕޯޓް މަނާ ކުރުމުގެ ބިލު މަޖިލީހަށް ވަދެ ތާށިވީއެވެ.
