އިޒްރޭލު ސިފައިން ފަލަސްތީނުގެ ދާރުލް ބަލާހްގައި ހުންނަ އަލް އަގްސާ މާޓިޔަރސް ހޮސްޕިޓަލްގެ ގޯތި ތެރޭގައި ހަދާފައިވާ ވަގުތީ ޓެންޓްތަކަކަށް ބޮން އަޅައިފިއެވެ.

މި ޓެންޓް ތަކަކީ ގެދޮރު ގެއްލިފައިވާ ފަލަސްތީން މީހުންގެ ވަގުތީ ހިޔަލެއްގެ ގޮތުގައ ބޭނުން ކުރަމުން އަންނަ ތަންތަން ކަމަށް ރިޕޯޓްތައް ބުނެއެވެ. މި ހަމަލާ ގައި ހަތަރު މީހުން ޝަހީދުވެ 18 މީހުން ޒަޚަމްވެފައިވެއެވެ.

އިންސާނީ ޚިދުމަތް ފޯރު ކޮށްދޭ ތަންތަނަށް އަމާޒު ކޮށް އިޒްރޭލު ސިފައިން ހަމަލާތައް ދެމުންދާ ކަން އެއީ ސާފުކޮށް އެނގެން އޮތް ކަމެއް ކަން މިހަމަލާ އާ ގުޅިގެން ދާރުލް ބަލާހްގައި ހުންނަ އަލް ޖަޒީރާގެ ރިޕޯޓަރު ބުނެފައިވެއެވެ.

އަލް-އަގްސާ ހޮސްޕިޓަލަށް އިޒްރޭލުން ހަމަލާ ދިން އިރު މި ތަނަކީ ވަޒަނުން ބޭރުކޮށްލާފައިވާ ފަލަސްތީނުގެ އެތައް ހާސް ރައްޔިތުންނަށް ސިއްހީ ޚިދުމަތް ދިނުމުގައި ގާޒާ ސްޓްރިޕްގެ މެދުތެރޭގައި ހުރި މައި ހޮސްޕިޓަލްކަން ރިޕޯޓަރުން ފާހަގަ ކުރެއެވެ.

މި ހަމަލާގެ އިރުކޮޅެއް ކުރިން ގާޒާ ސިޓީގެ ސްކޫލަކަށް ބޮން އަޅާ ފަލަސްތީންގެ 17 މީހުން ޝަހީދު ކޮށްލާފައިވެއެވެ.

ގާޒާގެ ހެލްތް މިނިސްޓްރީން ހާމަ ކޮށްފައިވާ ގޮތުގައި އޮކްޓޯބަރ 7 ވަނަ ދުވަހުން ފެށިގެން އިޒްރޭލުގެ ހަމަލާތަކުގައި މިހާތަނަށް ފަލަސްތީނުން ޝަހީދުވި މީހުންގެ އަދަދު 39،583 ށް ވަނީ އަރާފައެވެ. އިޒްރޭލުގެ ހަމަލާތަކުގައި ޒަޚަމްވި މީހުންގެ އަދަދު 91،398 ށް ވަނީ އަރާފައެވެ.

މި ފާއިތުވި 24 ގަޑީއިރުގެ ތެރޭގައި އިޒްރޭލު ސިފައިން ފަލަސްތީނުގެ 33 މީހުން ޝަހީދު ކޮށްލާ، 118 މީހުން ޒަޚަމްކޮށްލާފައިވާ ކަމަށް ގާޒާގެ ހެލްތް މިނިސްޓްރީން ވަނީ ބުނެފައެވެ.