ހަނިމާދޫ އެއާޕޯޓުގައި މާރާމާރީ ހިންގި މީހާގެ ބަންދަށް 15 ދުވަސް ޖަހައިފި
4 އޯގަސްޓު 2024 | އާދީއްތަ 12:06މި މާރާމާރީ ހިންގާފައިވަނީ މިމަހުގެ 2 ވީ ހުކުރު ދުވަހުގެ ރޭގެ ވަގުތެއްގައި
ހަނިމާދޫ އިންޓަރނޭޝަނަލް އެއަރޕޯޓް
ހަނިމާދޫ އިންޓަނޭޝަނަލް އެއާޕޯޓުގައި މަސައްކަތް ކުރާ ދެ މުވައްޒަފެއްގެ މެދުގައި ހިންގި މާރާމާރީގައި ހައްޔަރުކުރި މީހާގެ ބަންދަށް 15 ދުވަސް ޖަހައިފިއެވެ.
އާދިއްތަ ދުވަހު ފުލުހުން ބުނީ މާރާމާރީ ހިންގާފައިވަނީ ހަނިމާދޫ އެއާޕޯޓު ތަރައްގީ ކުރުމުގެ މަސައްކަތް ކުރަމުންދާ ކުންފުނީގެ ދެ މުވައްޒަފުންގެ މެދުގައި ކަން މިހާތަނަށް ބެލިބެލުމުން އެނގިފައިވާ ކަމަށެވެ.
މި މައްސަލައާ ގުޅިގެން ހައްޔަރުކުރި މީހާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުނެއެވެ.
މި މާރާމާރީ ހިންގާފައިވަނީ މިމަހުގެ 2 ވީ ހުކުރު ދުވަހުގެ ރޭގެ ވަގުތެއްގައެވެ. އަދި ހަތިޔާރު ބޭނުންކޮށްގެން މާރާމާރީ ހިންގާފައިވާއިރު، އެކަކަށް އަނިޔާވެފައިވެއެވެ.
މައުލޫމާތު ލިބިފައިވާ ގޮތުގައި މާރާމާރީގައި އަނިޔާވެފައިވަނީ އުމުރުން 37 އަހަރުގެ އިންޑިއާ ފިރިހެނަކަށެވެ. ހަމަލާދިން ކަމުގެ ތުހުމަތުގައި ހައްޔަރު ކޮށްފައިވަނީ 39 އަހަރުގެ އިންޑިއާ ފިރިހެނެކެވެ. އަނިޔާވި މީހާ ވަނީ ހަނިމާދޫ ހެލްތު ސެންޓަރުގައި ފަރުވާ ދީފައިވެއެވެ.
ފުލުހުން ދަނީ އިތުރަށް މިމައްސަލަ ތަހުގީގު ކުރަމުންނެވެ.
