ރ.އަތޮޅު ރިސޯރޓްތަކުގެ މެދުގައި މީދޫ އެކުވެރި ކްލަބުން ބާއްވ ދެވަނަ ވޮލީ މުބާރާތް ފަށައިފި އެވެ.

މީދޫ ކައުންސިލުން އެރަށުގައި އެޅި ފެންވަރު ރަނގަޅު ވޮލީކޯޓްގައި ހޮނިހިރު ދުވަހުގެރޭ ފެށި މުބާރާތުގައި 8 ރިސޯރޓުން ވާދަކުރެވެއެވެ. އިތާ އިންޓަރ ރިސޯރޓް ވޮލީބޯޅަ މުބާރާތުގެ ނަމުގައި ކުރިއަށް ގެންދާ މުބާރާތް ފައްޓަވައިދެއްވީ ވޮލީބޯޅައާއި ފުޓްބޯޅައިންވެސް ފާހހަގަކުރެވުނު ޝަހުސިއްޔަތު ސައްޔިދު އަލީ އެވެ. މުބާރާތުގެ ފުރަތަމަ މެޗު ވާދަވެރި ކުޅުމަކަށްފަހު ކާމިޔާބުކުރީ ޖޯލި ބީން އެވެ. ގްރޫޕް އޭގެ މެޗު ޖޯލި ބީން ކާމިޔާބުކުރީ ކުޑަފުއްޓާ ވާދަކޮށް 3-1 ސެޓުންނެވެ. މެޗުގެ ސެޓްތައް ޖޯލި ބީން ގެންދިޔައީ 25-17, 18-25, 25-21, އަދި 25-22 ނެވެ. މެޗުގެ މޮޅު ކުޅުންތެރިއަކީ ޖޯލި ބީންގެ ޝެހާން އެވެ. މިދެޓީމަކީ މީދު އެކުވެރި ކްލަބުން މިދިޔަ އަހަރު ބޭއްވި އިތާ އިންޓަރ ރިސޯރޓް ފުރަތަމަ ވޮލީބޯޅަ މުބާރާތުގެ ފައިނަލްގައި ވާދަކުރި ދެ ޓީމެވެ.

ގްރޫޕް އޭގައި މިދެޓީމްގެ އިތުރުން ހިމެނެނީ މާމުނަގައު, އަދި މީދުއްޕަރެވެ. ގްރޫޕް ބީގައި ހިމެނެނީ ރީތިފަރާއި, ފާރަފުއްޓާއި, ޖޯލި މޯލްޑިވްސްއާއި, ހެރިޓަންސް އާރަށެވެ. މުބާރާތް ފަށަން މީދޫ ވޮލީ ކޯޓްގައި ކުލަގަދަ ރަސްމިއްޔާތެއް ބޭއްވިއެވެ. މިމުބާރާތުގެ ފައިނަލް މެޗު ތާވަލް ކޮށްފައި ވަނީ މިމަހުގެ 17 ވަނަ ދުވަހުގެ ރެއަށެވެ. މުބާރާތް ކުރިއަށް ގެންދަނީ ކުޅިވަރާބެހޭ ވުޒާރާގެ އިތުރުން ވޮލީބޯޅަ އެސޯސިއޭޝަނާވެސް ގުޅިގެންނެވެ.