މެމްބަރުންގެ އަދަދާއި ގުޅޭ އީސީގެ ލފާ - ލިމިޓް ހަމަޖައްސާ އަތޮޅަކަށް 2، އަދި ބާކީ ގޮނޑިތައް އާބާދިއަށް ބަލާފައި ބަހާލުން

ރައްޔިތުންގެ މަޖިލީހުގެ މެންބަރުން އިތުރުވަމުން އަންނަ މައްސަލައިގައި އިލެކްޝަންސް ކޮމިޝަނުން، އެ ކޮމިޝަންގެ ލަފާ މިނިވަން މުއައްސަސާތަކުގެ ކޮމިޓީއަށް ދީފިއެވެ.

ހޯމަ ދުވަހު ބޭއްވި މިނިވަން މުއައްސަސާތަކުގެ ކޮމިޓީގައި އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވީ މެންބަރުންގެ އަދަދު ކޮމިޝަނުން ކަނޑައެޅުމުގެ ބަދަލުގައި ބޭނުންވަނީ މެންބަރުންގެ އަދަދު ލިމިޓްކުރުމަށް ކަމަށެވެ. އެގޮތުން ވަކި އަދަދެއް ކަނޑައެޅުމަށްފަހު ކޮންމެ އަތޮޅަކަށް މަދުވެގެން 2 މެންބަރުން ހަމަޖައްސާ، އަދި ލިމިޓަށް ބަލާފައި އިތުރުވާނަމަ އާބާދިއަށް ބަލާފައި މެންބަރުން ބަހާލުން ކަމަށެވެ.

ފުއާދު ވިދާޅުވީ މަޖިލީހުގެ އެއްދައުރުން އަނެއް ދައުރަށް މެންބަރުންގެ އަދަދު އިތުރުވާ އިރު، އެ އަދަދު ލިމިޓްނުކުރުމުގެ ސަބަބުން ބައެއް އިންތިހާބުތަކުގައި މުޅި ދާއިރާ އެއްކޮށް ބަދަލުކުރަން ޖެހޭ ހާލަތާ ދިމާވާ ކަމަށެވެ. އޭގެ މިސާލެއްގެ ގޮތުގައި ފުއާދު ނެންގެވީ ގއ. އަތޮޅުގެ އިދާރީ ދާއިރާތައް ބަދަލުކުރުމާއި އާބާދީއަށް އައި ބަދަލާއެކު ކުރިން އޮތްގޮތް ނޫން މުޅިން އެހެން ގޮތަކަށް ދާއިރާތައް ބަދަލުކުރަންޖެހުމެވެ.

ފުއާދު ވިދާޅުވީ މެންބަރުންގެ އަދަދުގައި ކެޕް އެޅުވިފައި އިނުން އެއީ ކޮމިޝަންގެ ސްޓޭންޑް ކަމަށެވެ. އަދި 77 ވިޔަސް 65 ވިޔަސް އަދި 75 ވިޔަސް ކެޕް ވެފައި ކޮންމެ އަތޮޅަކަށް ދެ ސީޓް ލިބިފައި އާބާދީގެ ނިސްބަތުން ކަނޑައެޅުން އެއީ ކޮމިޝަނުން ބޭނުންވާ ގޮތް ކަމަށެވެ.

މަޖިލީހުގެ ދާއިރާތައް މިހާރު އޮންނަނީ ކޮންމެ 5،000 މީހުންގެ އާބާދީއަކަށް ގޮނޑިއެއްގެ ބީދައިންނެވެ. މި އުސޫލާއެކު ކޮންމެ ފަސް އަހަރަކުން ދާއިރާތައް ދަނީ އިތުރުވަމުންނެވެ.