ކުޅުންތެރިން އޭނާގެ ޕްލޭނަށް ފަރިތަވެ, ހޭނެއް ޖެހޭކަމަށް ޗެލްސީގެ އާ ކޯޗު އެންޒޯ މަރެސްކާ ބުނެފިއެވެ.
ކުރިއަށް އޮތް ސީޒަނަށް ޗެލްސީއާ ހަވާލުވި ކޯޗު މަރެސްކާ މިފަދައިން ވަހަކަ ދައްކާފައި ވަނީ އާ ސީޒަނަށް ތައްޔާރުވާން ސެލްޓިކާ ދެކޮޅަށް ކުޅުނު މެޗުން 4-1 ން ބަލިވެފައި ވަނިކޮށެވެ. އެމެޗަށްފަހު މަރެސްކާ ބުނީ އޭނާގެ ސްޓައިލާއި ޓެކްޓިކްސްއަށް ހޭނެން ކުޅުންތެރިން މަސައްކަތް ކުރަމުންދާ ކަމަށެވެ. ބޯޅައާއެކު އޭނާގެ ޓީމް ރަނގަޅު ނަމަވެސް ބޯޅަ ނެތް ވަގުތު ރަނގަޅު ނޫންކަން ފާހަގަކުރަމުން ބުނީ ރަނގަޅު ކުރަން ޖެހޭ ކަމަށެވެ. މަރެސްކާގެ އިރުޝާދުގެ ދަށުން ޗެލްސީ މިހާތަނަށް ކުޅުނު ދެ މެޗުންވެސް މޮޅެއް ނުލިބެއެވެ. ފުރަތަމަ މެޗުގައި ޗެމްޕިއަންޝިޕް ޓީމަކާ ވާދަކޮށްވެސް ވީ އެއްވަރެވެ. ކޯޗު މަރެސްކާ ބުނީ އަލަށް ކަމެއް ކުރަން އުޅޭއިރު އުނދަގޫތަކެއް ހުންނާނެ ކަމަށެވެ.
ސެލްޓިކް އަތުން ބަލިވި ނަމަވެސް މެޗުގައި ޗެލްސީން 23 ޝޮޓް ފޮނުވާލިއެވެ. ސެލްޓިކުން ފޮނުވާލީ 14 ޝޮޓެވެ. ބްރެންޑަން ރޮޖަރސްގެ އިރުޝާދުގެ ދަށުން ކުޅޭ ސެލްޓިކުން ވަނީ އާސީޒަނަށް ތައްޔާރުވާން ކުޅުނު މެޗުގައި ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީވެސް ބަލިކޮށްފައެވެ. ލީގުގައި ޗެލްސީގެ ފުރަތަމަ މެޗުގައި އޮގަސްޓް 18 ވަނަ ދުވަހު ވާދަކުރަން ޖެހެނީ ސިޓީއާއެވެ. ކޯޗު މަރެސްކާ ބުނީ ސިޓީއާ ދެކޮޅަށް ނިކުންނަން ޗެލްސީ ތައްޔާރު ކަމަށެވެ.
